Të djathtët shqiptarë duken se janë kundër votës shqiptare kundër njohjes së Jeruzalemit si kryeqytet i Izraelit, që është komentuar gjerësisht si një ndëshkim për administratën Trump në trupën më prestigjioze ndërkombëtare. Pas rezervave të shprehura nga demokratët, edhe kreu i PR-së, Fatmir Mediu e cilëson votën e Tiranës zyrtare një veprim i nxituar.
“Vota e Shqipërisë kundër SHBA është një hap i nxituar, absurd, i nisur nga interesat personale politike të Edi Ramës dhe jo interesat e Shqipërisë, eshte kundër interesave kombëtare”, shprehet kreu i PR.
Por, duket se qeveria e ka pritur këtë reagim, pasi siç aludon zëvëndesministri i Mbrojtjes Petro Koçi në një postim në median sociale, “sido që të kishte qenë vota e Shqipërisë, e djathta prapë do turfullonte njësoj”.
“Në asnjë pikë të programit të politikës së jashtme të PD nuk thuhet se njohin Jeruzalemin si kryeqytet të Izraelit. Dhe kur ishin në pushtet se kanë vënë kurrë në diskutim Tel Avivin si kryeqytet”, shkruan Koçi. /tesheshi.com/
