E njohur për qëndrimin e fortë kundër emigrantëve, partia gjermane e ekstremit të djathtë, Alternativa për Gjermaninë, AfD, ka kërkuar përmes kryetares së saj, Frauke Petry, që emigrantët ilegalë dhe ata të cilëve nuk është pranuar kërkesa për azil të dërgohen në ishuj jashtë Europës.
Udhëheqësja e AfD-së është shprehur në një intervistë në gazetën gjermane Bild se do të donte t’i shihet të gjithë emigrantët e paligjshëm që jetojnë në vendin e saj, si dhe aplikuesit të cilëve u ishte mohuar azili, të dërgoheshin në dy ishuj jashtë Europës që janë të mbrojtur nga OKB-ja.
Edhe pse ajo nuk e ka qartësuar se për çfarë ishujsh bëhej fjalë, në median gjermane është vënë gishti në dy ishuj të Paqësorit, Nauru dhe Manus, të shfrytëzuar nga Australia për kampe azili, e që janë 14.000 dhe 13.200 kilometra larg Gjermanisë.
Dy ishujt janë famëkeqë për shkak të raportimeve të shumta mbi abuzimet dhe torturat ndaj refugjatëve të mbajtur atje, e që jetojnë në kushte të papërballueshme.
Ajo ka propozuar gjithashtu shndërrimin e Zyrës Federale Për Migracion dhe Refugjatë në një zyrë për emigracionin, që të garantojë largimin sa më shpejt të emigrantëve ilegalë nga Gjermania.
Frauke Petry, së bashku me partinë që ajo drejton, kanë një qëndrim të fortë kundër emigrantëve dhe refugjatëve, të shprehur hapur në çdo rast të mundshëm. Ato janë akuzuar se e shfrytëzojnë populizmin dhe frikën e përgjithshme për të fituar mbështetje politike në këtë kohë të trazuar. /tesheshi.com/
