Të djathtët bojkotuan mbledhjen e këshillit bashkiak të Tiranës në shenjë mbështetjeje ndaj protestës 47 ditore në bulevardin “Dëshmorët e Kombit”. Grupi këshilltarëve të PD-së, Leonard Olli sqaroi se vendimi për bojkot është marrë për të qënë pjese intergrale e protestës në çadër. “Nuk mund të jemi pjesë e farsave të pseudoreformave”, shtoi ai.
Por, për kryetarin e bashkisë së kryeqytetit, Erion Veliaj ky bojkot tregon se në qytet ka dy kategori personash, ata që punojnë dhe ata që zgjedhin të merren me fjalë. “Në fund janë qytetarët ata që bëjnë dallimin dhe nuk kam asnjë lloj dyshimi se këtë dallim do ta bëjnë nisur nga punët e jo nga fjalët, tha Veliaj.
Me 32 votat e këshilltarëve të PS-së, LSI-së dhe PDIU-së, Këshilli Bashkiak miratoi 16 projektvendime në rendin e ditës. Një ndër porpozimet e miratuara me rëndësi për shëndetin e konsumatorëve është ndërtimi i një thertoreje publike për të kontrolluar mënyrën se si theren bagëtitë, higjienën dhe standardet.
Duke u shfaqur dramatik përpara këshillit bashkiak, Veliaj tha se ka të dhëna tronditëse.
“Nuk dua të hap panik po dua të them një të vërtetë që fillojmë dhe e korrektojmë sot, 70% e mishit që tregtohet sot në Tiranë ka një origjinë krejtësisht të panjohur. Nuk dihet as ku theret, as në ç’kushte theren”, tha ai. /tesheshi.com/
