Aleanca Popullore, mes AKP-së, Partisë për Drejtësi dhe Zhvillim, dhe MHP-së, Partisë së Lëvizjes Nacionaliste, është fituese e pakundërshtueshme e zgjedhjeve lokale në Turqi, të mbajtura të dielën e 31 marsit.
Përqindja e fitores, 51.62%, është bindëse, qartazi shprehëse e mbështetjes së popullit turk për qeverisjen aktuale.
Partia e presidentit Erdogan i ka fituar dhe një herë tjetër këto zgjedhje, siç ka bërë në të gjitha zgjedhjet që nga viti 2002. AKP-ja ka mbledhur më shumë vota se çdo parti tjetër, 44.31%. Shifra flet për prirje të pandryshuar në mbështetjen ndaj saj.
Megjithatë, aleanca fituese ka humbur në Ankara, ku fitues është Mansur Javash, kandidati i Aleancës Kombëtare. Në Stamboll po ashtu kryeson Ekrem Imamogllu, kandidati opozitar. Gara në metropol ka qenë veçanërisht e jashtëzakonshme; rezultati është shumë i ngushtë, me disa mijëra vota që e bëjnë humbës Binali Jëlldërëmin, ish-kryeministrin dhe ish-kryetarin e parlamentit turk.
Zyrtarë të AKP-së kanë deklaruar se do t’i ankimojnë rezultatet, pasi kanë ndeshur parregullsi. Kjo është e natyrshme, në të drejtën e çdo partie. Në të njëjtën logjikë të AKP-së, në shifrat e deklaruara gjer tani ka gjëra të çuditshme. Shumë prej shifrave nuk ndjekin të njëjtën kahje, madje kanë kthesa të forta. Habi në të njëjtën kohë përbën fakti se si të ngarkuarit e AKP-së për zgjedhjet nuk kanë qenë të vëmendshëm t’i presin rrugën çdo manipulimi të mundshëm, të pritshëm në këto zgjedhje prej aleancës opozitare!
Në Stamboll, Ekrem Imamogllu, kandidati i opozitës, ka mbledhur 48.79% të votave; 4.169.987 vota janë për të. Binali Jëlldërëm është në shifrën 48.51%, ndryshe votat për të janë 4.146.042. Diferenca midis tyre është mbi njëzet mijë vota, ndërkohë që votat e pavlefshme janë diku te treqind mijë.
Nëse ky është rezultati për bashkinë qendrore, nga 39 bashkitë e vogla, 24 janë të fituara nga AKP-ja, 14 nga CHP-ja dhe 1 nga MHP-ja. Ky është paradoksi i parë. Tjetri është akoma më mendimvënës. AKP-ja ka mbledhur 45.55% të votave për këshillin bashkiak qendror, ndryshe, 3.883.672 vota. CHP-ja ka 7 për qind më pak, vetëm 38.53%; përkthyer në vota, 3.285.042. Bëhet fjalë për një diferencë me rreth gjashtëqind mijë vota! Si është e mundur?
E njëjta panoramë në Ankara. Kandidati i Aleancës Kombëtare të opozitës ka marrë 50.91% të votave, apo 1.661.523 vota. Kandidati i AKP-së, Mehmet Ozhaseki, ka 47.10% të votave, ndryshe, 1.536.908 vota.
Kjo diferencë nuk reflektohet më në bazë. Kështu, AKP-ja ka fituar 19 prej bashkive të vogla, CHP-ja ka tre të fituara, dhe po kaq MHP-ja. Në votimet për këshillin bashkiak qendror, AKP-ja kryeson me 40.97%; 1.331.005 vota i janë dhënë asaj. CHP-ja ka 37.88% të votave; 1.230.458 vota. Siç shihet, bëhet fjalë për rreth njëqind mijë vota më shumë për AKP-në.
A ka një shpjegim bindës dhe shterues për këto shifra mospërputhëse? Apo kemi të bëjmë me parregullsi, nëse përdorim fjalën më të butë, për të mos shkuar më tej.
Çka na thonë këto shifra me siguri është se kemi një realitet krejt tjetër në terren. Si kanë dalë fitues kandidatët e opozitës në Ankara e Stamboll mbetet për t’u zbuluar. /tesheshi.com/
