Më shumë se 8,500 fëmijë u përdorën për qëllime ushtarake vitin e kaluar në konflikte në të gjithë botën dhe gati 2,700 fëmijë u vranë, tha OKB të hënën, raportoi Reuters.
Raporti vjetor i Sekretarit të Përgjithshëm të KB Antonio Guterres drejtuar Këshillit të Sigurimit mbi fëmijët dhe konfliktet e armatosura përfshin vrasjen, gjymtimin dhe abuzimin seksual të fëmijëve, rrëmbimin ose rekrutimin, mohimin e ndihmës humanitare dhe sulmet ndaj shkollave dhe spitaleve.
Ai konfirmon shkeljet e të drejtave dhe masat e mbrojtjes së 19,379 fëmijëve në 21 konflikte. Numri më i lartë i shkeljeve në vitin 2020 u krye në Somali, Republikën Demokratike të Kongos, Afganistan, Siri dhe Jemen.
Gjithashtu u përcaktua që vitin e kaluar 8,521 fëmijë u përdorën si ushtarë, ndërsa 2,674 fëmijë të tjerë u vranë dhe 5,748 u plagosën në konflikte të ndryshme.
Raporti përfshin gjithashtu një “listë të zezë” të aktorëve politikë që praktikojnë dhunë ndaj fëmijëve, ose vende ose grupe që vrasin, plagosin ose abuzojnë fëmijë. Ka edhe nga ata që rrëmbejnë fëmijë ose i rekrutojnë për luftëra, si dhe nga ata që parandalojnë ndihmën humanitare për të arritur tek fëmijët dhe sulmojnë shkolla ose spitale.
Arabia Saudite dhe Izraeli, jashtë listës
Lista ka qenë prej kohësh e diskutueshme pasi diplomatët besojnë se Arabia Saudite dhe Izraeli po bëjnë presion për të qëndruar jashtë listës.
Izraeli nuk ka qenë asnjëherë në listë, ndërsa një koalicion ushtarak i udhëhequr nga Saudia është hequr nga “lista e zezë” e KB në vitin 2020, tre vjet pasi u vendos aty për vrasjen dhe plagosjen e fëmijëve në Jemen.
Në një përpjekje për të lehtësuar polemikat rreth raportit, lista e zezë e botuar nga Guterres në 2017 u nda në dy kategori. Njëri rendit aktorët që kanë vendosur masa për mbrojtjen e fëmijëve dhe tjetri ata që nuk kanë.
Disa ndryshime të rëndësishme në lista u njoftuan të hënën.
Aktorët e vetëm që thuhet se nuk kanë miratuar masat janë ushtria e Mianmarit e akuzuar për vrasje, plagosje dhe dhunë seksuale ndaj fëmijëve dhe forcat e qeverisë siriane – për rekrutimin e fëmijëve, vrasjen, plagosjen dhe dhunën seksuale ndaj fëmijëve dhe sulmet në shkolla dhe spitale. /tesheshi.com/
