Nga statistikat e nxjerra nga “Earth Institute” për indeksin e lumturisë në krahasim me vendet e rajonit, Maqedonia qëndron në fund të listës, por nga ana tjetër, qëndron shumë mirë për nga liritë ekonomike si dhe kushtet për të bërë biznes.
Qytetarët ankohen për pagat ose pensionet e vogla në vend dhe për këtë shumica janë të mendimit se jeta në mërgim është zgjidhja më e mirë për një jetë më të lumtur.
Për indeksin e perceptimit të korrupsionit, Maqedonia është në nivele të palakmueshme . Sipas llogaritjeve të Transparency International, nga 176 vende gjithsej, vendi gjendet në pozitën e 90-të, pas Bosnje e Hercegovinës, Serbisë, Malit të Zi, Kroacisë dhe Sllovenisë.
Në krahasim me vendet e rajonit, Maqedonia është në mes të listës për nga fuqia apo dobësia e shteteve, flasin të dhënat e “Fondit për Paqe”. Po ashtu, nëse krahasohet me vendet e rajonit, në mes të tabelës qëndrojmë edhe për vlerën e pasaportës. Me pasaportë maqedonase, pa vizë, mund të udhëtohet në 108 vende të botës. Pas Maqedonisë, në listë janë Mali i Zi, me pasaportën e të cilit mund të udhëtohet në 105 vende, ndërkaq, me pasaportë boshnjake mund të udhëtohet në 101 vende. Më keq qëndron Kosova, me pasaportën e të cilës, pa viza, mund të udhëtohet vetëm në 41 vende të botës.
Sa u përket lirive ekonomike, Maqedonia gjendet në vendin e 31-të nga 180 shtete gjithsej. Në krahasim me vendet e rajonit, vendi është në krye të listës. Njëjtë qëndron edhe sa u përket lehtësive për udhëheqje të biznesit, thonë të dhënat e Bankës Botërore. /tesheshi.com/
