Nga Bashkim Kastrati
Përmirësimi i kushteve të punës në institucionet shëndetësore nuk ka qenë asnjëherë prioritet real i qeverive të deritanishme.
Duket i pakuptimtë fakti se miliona euro shpenzohen për vetura luksoze, mëditje, mbushje telefoni, derivate, ndërsa nuk ka barna në spitale, nuk ka materiale harxhuese.
Në muajin nëntor të vitit të kaluar është vendosur që të shpenzohen edhe 7.2 milionë euro nga buxheti i shtetit për marrjen e 358 veturave me qira të cilat do t’i shfrytëzojnë për 66 muajt e ardhshëm, ndonëse në dispozicion janë mijëra vetura për stafin e nivelit qendror dhe lokal.
Derisa bëhet i gjithë ky shpenzim për vetura me qira, institucionet publike shëndetësore në Kosovë i kanë në dispozicion vetëm 92 autoambulanca, në mungesë të së cilave shpesh rrezikohet edhe jeta e pacientëve. Ndërkaq, disa qendra kryesore të mjekësisë familjare kanë vetëm një autoambulancë dhe kur kërkohet të intervenohet në dy raste të njëhershme, atëherë rrezikohet edhe jeta e qytetarëve, derisa institucionet e vendit vlerësohet se i kanë në dispozicion mijëra vetura për shërbyesit civilë.
Përmes një tenderi publik të zhvilluar nga Agjencia Qendrore e Prokurimit (AQP) kompania “Automita” ka fituar 4 llote të tenderit: “Shfrytëzimi afatgjatë i automjeteve me qira”, ku vlera e të gjitha loteve është mbi 7.2 milionë euro, derisa kontrata mes autoritetit kontraktues dhe kompanisë fituese është nënshkruar më 16 dhe 24 tetor të vitit 2017.
Për shfrytëzimin e një veture “Dacia Sandero Ambiance” institucionet do t’i paguajnë 247 euro në muaj, derisa për shfrytëzimin e një automjeti “Renault Megan” do t’i paguajnë 347 euro në muaj.
Përfaqësuesit e Shoqatës për të Drejtat e Pacientëve në Kosovë, në vazhdimësi kanë deklaruar se në bazë të numrit të banorëve institucionet publike shëndetësore duhet të kenë më shumë ekipe mjekësore dhe autoambulanca në shërbim.
Shembull: Komuna e Hanit të Elezit posedon vetëm dy autoambulanca, njërën më të vjetër, e cila është aksidentuar disa herë, dhe një më të re, që është vënë në dispozicion të Qendrës Mjekësore katër vjet më parë. Këto dy ambulanca nuk plotësojnë për së afërmi nevojat e qytetarëve të kësaj komune, që ka rreth 10 mijë banorë.
“Një autoambulancë nuk krijon fitime për pushtetarët”
Xhemajl Selmani kryetar i Sindikatës së Qendrës Klinike Universitare të Kosovës ka thënë për tesheshi.com se institucionet e vendit kanë bërë vazhdimisht shpenzime të shumta që mund të konsiderohen luks nëse krahasohen me nevojat e institucioneve shëndetësore.
“Për shkak të lakmisë dhe interesave meskine harxhohet paraja publike pa dhimbje dhe pa ndonjë llogari efiçiente. Shëndetësia është e kushtueshme dhe nuk lejon hapësirë për investime të çfarëdoshme dhe harxhime të pakuptimta e të pamatshme”, thotë Selmani.
Ai thotë se investimi në automjete, karburante, mirëmbajtje të tyre, mbushje të telefonave krijon bazën për shpenzime të mëdha, të pa kuptimta dhe vështirë të matshme, sepse me to udhëtohet si në kohë fushatash ashtu edhe jashtë asaj kohe, për punë të shtetit, sipas tij, për kokërr të qejfit.
“Me këto hapen horizonte të reja nga këtu, pra Prishtina e deri nëpër qytetet e regjionit dhe rajonit, hapet perspektiva e mëditjeve brenda dhe jashtë shtetit. Këto mëditje nuk janë të dobëta edhe brenda por kur dilet jashtë shtetit janë goxha të majme. Pra një autoambulancë nuk krijon fitime për pushtetarët, ajo mund t’ju hyjë në shërbim atyre që kanë nevojë për te, pra të sëmurëve e assesi burokratëve të cilët funksionojnë për interesa meskine dhe personale”, theksoi Selmani. /tesheshi.com/
