Regjistrimi i ish-ministrit grek te Financave Yanis Varoufakis ku ai u tregon menaxherëve për planin e tij sekret për krijimin e një sistemi paralel pagesash në Greqi, kanë nxjerrë në dritë edhe krizën në marrëdhëniet mes Berlinit dhe Parisit. Në një nga këto regjistrime që tashmë janë publikuar online nga Forumi zyrtar i Institucioneve Monetare dhe Financiare, Varoufakis u shpjegon të pranishmëve sesi Qeveria franceze është e tmerruar nga kërkesat për masa kursimi të Gjermanisë.
Ai thotë, pasi ka shpjeguar planin e tij sekret B për shpëtimin e Greqisë përmes hakerimit të të dhënave në sistemin e Ministrisë, se Parisi po luan për të fituar kohë, përballë kërkesës gjermane për një union më të ngushtë fiskal.
“Francezët janë të tmerruar. Ata ndihen kështu pasi e dinë se nëse u duhet të rrudhin deficitin e tyre buxhetor deri në nivelin që kërkon Berlini, qeveria franceze me siguri do të rrëzohet”, thotë Varoufakis.
“Nuk ka asnjë mundësi që ata të mund të menaxhojnë politikisht llojin e kursimeve që kërkon Berlini”.
Varoufakis shpjegon më tej sesi Wolfgang Schwuble i ka paraqitur atij vetë planin për riformatimin e eurozonës, për t’i dhënë më shumë bashkim politik dhe për ta bërë të qëndrueshëm.
Sipas asaj që thotë ish-ministri grek, Shojble dëshironte një Grexit për të dhënë shembull për të tjerët.
Gazeta “Kathimerini” publikoi që dje pasazhe të plota të regjistrimeve të bisedës së Varoufakis, që solli edhe publikimin e plotë online zyrtar të deklaratave të tij. Nuk dihet sesi arriti Kathimerini të marrë këto regjistrime.
Por, duket se me deklaratat e tij Varoufakis rrezikon të paditet për mashtrim, pasi pranon se plani B përfshinte hakerimin e të dhënave zyrtare të ministrisë së Financave. /tesheshi/
