Në rrugët e Shqipërisë u shënua një tjetër rast tragjik me të trushkulur në timon, kryesisht të rinj të çartur, me gjasë dhe nën efekte lëndësh narkotike apo alkooli, të cilët marrin jetë njerëzish.
Kështu, në unazën e Durrësit, në zonën e Kënetës, një 17-vjeçar në timonin e një Mercedezi morri jetën e një 50-vjeçari mbi biçikletë. Pamjet e dala në media tregojnë Mercedezin që fluturon nga shpejtësia e lartë dhe del nga rruga, pasi më parë ka shkaktuar një viktimë.
Paralel me këtë ngjarje të rëndë, TCH denoncoi rastin e një të riu që u lirua nga gjykata, i cili kishte aksidentuar një anëtare stafi të kësaj mediaje duke u kthyer nga puna në orët e natës.
Në të dy rastet bëhet fjalë për të rinj në timon, nga ato që zakonisht ecin me një tangërllëk të padurueshëm rrugëve, me një dorë në timon e tjetrën në celular, posedues makinash luksoze pa qenë në punë, ku nga brenda tyre lëshohen me zë të lartë ca këngë të shëmtuara nga Kosova, jo patriotike por të tipit llapa-zhdrapa, me tekste të ndyra, deri dhe krimnxitëse, të cilat janë në modë te pjesa më e pakultivuar e rinisë, si në Shqipëri e si në Kosovë, të padurueshme për veshin e njeriut normal. /tesheshi.com/
