Pas kapitenit Philipp Lahm, një tjetër element kyç i skuadrës bavareze bëhet gati t’i japë fund karrierës si futbollist. Këtë herë është radha e një spanjolli, mesfushorit Xabi Alonso.
Bajerni i Mynihut do të duhet të bëjë pa këta dy lojtarë në sezonin pasues, kur ata të mos zbresin më në fushë. “Një nga të mëdhenjtë po thotë mirupafshim. Xabi Alonso do të tërhiqet në fund të sezonit nga futbolli profesionist,” shkruhej dje në mesditë në llogarinë e klubit gjerman në një prej rrjeteve sociale.
Tashmë 35-vjeç, me shumë trofe të fituar, Alonso ka menduar se është momenti i duhur për t’u tërhequr.
“Kam dashur t’i jap fund karrierës sime në nivelin më të lartë, dhe Bajerni është niveli më i lartë,” njoftoi futbollisti që gjatë jetës së tij futbollistike u aktivizua me Real Sociedadin, me Liverpulin, Realin e Madridit dhe, në fund, me Bajernin e Mynihut.
“E jetova, e dashurova. Lamtumirë lojë e bukur,” e përcjell lajmin me nota romantike Alonso.
Një kampion bote me Spanjën, për të cilën luajti në 114 takime, ai është fitues i shumë titujve si me Liverpulin, me Realin apo me Bajernin. /tesheshi.com/
