Njëjtë si para dy ditësh, edhe sot, gjykimi për 29 të akuzuarit për terrorizëm në betejën e “Lagjes së Trimave” në Kumanovë, ëshë mbajtur nën masa të shtuara të forcave policore.
Në këtë seancë, i pari nga të akuzuarit para trupit gjykues është deklaruar shtetasi i Kosovës, Rufki Dogani. Ai ka pohuar që Beg Rizaj, Mirsad Ndrecaj, Valon Kabashi dhe Sami Kastrioti i janë dorëzuar policisë dhe se ata janë ekzekutuar pasi që janë dërguar në stacionin policor; dhe jo siç pretendojnë organet kompetente maqedonase se ata janë vrarë gjatë betejës me njësitet speciale të Maqedonisë.
Kjo sipas tij, ka ndodhur për qëllime politike dhe me qëllim që të fshihet e vërteta që qëndron pas ngjarjeve në Kumanovë.
I akuzuari tjetër, Nasuf Zekaj para trupit gjykues ka deklaruar se urdhëri i Beg Rizajt ka qenë i prerë që të mos sulmohet policia, por të gjuhet me armë zjarri në ajër dhe se nuk kanë patur ndërmend që të luftojnë, prandaj ka bërë thirrje që ky rast të sqarohet deri në fund.
Ndërsa avokati mbrojtës i Begim Kabashit, Elenko Millanov, në fjalën e tij, mes tjerash deklaroi se këto ngjarje të përshkruara në aktin paditës, nuk mund të trajtohen si terrorizëm pasi që sipas teorisë së të drejtës, terrorizmi nënkupton ekzistimin e qëllimeve politike, dhunës ndaj institucioneve dhe ndaj qytetarëve për të shkaktuar frikë dhe terror, që në këtë rast nuk ekziston. /tesheshi.com/
