Siç njofton agjencia e lajmeve RIA Novosti, në Taxhikistan është gjetur si zgjidhje për frenimin e fjalëve jo të njohura për lexuesin një gjobë për gazetarin. Kështu, gazetarët do të gjobiten gjer në 100 dollarë për fjalë të tilla, të pakuptueshme për lexuesin e rregullt.
Ndërkaq, për zyrtarët shtetërorë e për organizatat, shuma e gjobës pritet të jetë dyfish më e lartë, gjer në 200 dollarë. Megjithatë, ende nuk dihet se kur do të hyjnë në fuqi rregullat e reja në lidhje me përdorimin e gjuhës.
Kryetari i komitetit shtetëror të gjuhës, Gavkhar Sharifzoda, e shpjegoi kështu shqetësimin e institucionit të tij, “Ka raste kur gazetarët përdorin deri në dhjetë fjalë në ditë që nuk janë të kuptueshme për lexuesin, shikuesin apo dëgjuesin e rregullt. Kjo i cenon fund e krye normat e gjuhës shtetërore.”
“Ka rregulla shkrimi dhe kërkesa për respektimin e normave të gjuhës zyrtare që ne të tërë jemi të shtrënguar t’i ndjekim,” ka nënvizuar zyrtari i mësipërm.
Rusishtja, e folur gjerësisht në ish-republikën sovjetike, është hequr në vitin 2009 si një gjuhë zyrtare.
Shtete të tjera ish-sovjetike kanë rregulla pak a shumë të ngjashme në lëmin e gjuhës. /tesheshi.com/
