Detyrimi që disa biznese në Shqipëri i kanë shtetit, ku përfshihen dhe gjobat e kamatvonesat, shkon në 1.1 miliardë euro. Pra, aq sa “çeku i bardhë” i promovuar nga Rama, për të injektuar në ekonomi dhe rritur atë. Kjo shifër ofrohet nga një raport i Kontrollit të Lartë të Shtetit, i cili fajëson administratën tatimore
“Administrata Tatimore nuk ka arritur të menaxhojë detyrimet tatimore të papaguara në afat dhe të zbatojë me efektivitet masat shtrënguese për mbledhjen e tyre”, thuhet nga KLSH, cituar nga TCH.
“Drejtoria e Tatimeve nuk ka mundur të vjelë detyrimet e papaguara nga subjektet tatimpaguese, pasi nuk ka krijuar kushtet për zbatimin e ligjit”, thuhet më tej në raport.
Kjo do të thotë se tatimorët kanë marrë rrogën pa bërë punën.
Nga ana tjetër TCH thotë se krahasuar me vitin 2011, detyrimet e papaguara të bizneseve në shtet janë rritur me 2.2 herë.
Shifra prej 1.1 miliardë eurosh të borxheve që biznesi ka në shtet është e barabartë me gati 10 për qind të prodhimit kombëtar. Nëse këto detyrime do të mblidheshin, paratë e arkëtuara do të mjaftonin që qeveria të ulte borxhin publik nga 70 për qind e prodhimit kombëtar, që është sot, në 60 për qind, pa rritur taksat mbi qytetarët dhe pa shkurtuar shpenzimet publike, thuhet në kronikën e TCH. /tesheshi.com/
