Nuk ka mbetur asgjë nga dy ekipet me të cilat krenohej Italia, me të cilat krenohej Seria A. Milanoja mund të vizitohet për modën, për gjithçka, por jo më për ekipet e futbollit.
Interi dhe Milani kanë vite që i kanë lëshuar frenat në tatëpjetë. Në vend të katërt përfundoi Interi sezonin e shkuar, 13 pikë larg vendit të tretë. Humbi mundësinë për të luajtur këtë sezon në Champions League. Më keq akoma Milani, i shtati në renditje, duke mos mundur të luajë as në Ligën e Europës.
Të dy ekipet janë dorëzuar në duar aziatikësh, në duar të kompanive kineze. Nuk ka më Massimo Moratti, nuk ka më Silvio Berlusconi.
Dhe sot vjen largimi i një njohjeje të vjetër të Interit: Roberto Mancini nuk është më trajneri i tij.
Largimi i Mancini-t qe paralajmëruar më herët, që me humbjen e thellë, 1-6, ndaj Totenhemit në miqësore. Dukej se diçka nuk shkonte, pasi ishte humbja e tretë në ndeshjet përgatitore. Mancini ishte ankuar për transferimet, një sinjal më tepër për largimin e tij.
Dhe Mancini detyrohet të largohet, veçse me “marrëveshje të ndërsjelltë”. Largohet duke dështuar në misionin e tij në rikthimin e dytë te Interi. Largohet pa e ngritur në këmbë Interin.
Në vend të tij do të vijë holandezi Frank de Boer, ish-trajneri i Ajaksit. Tre vite kontratë për holandezin, në një mision tejet të vështirë për të. /tesheshi.com/
