Që nga viti 2014, pothuajse 30,000 tatarë të Krimesë janë detyruar të largohen nga Krimea.
“Në maj, Prokuroria e Republikës Autonome të Krimesë, së bashku me organizatat joqeveritare, i dërguan Prokurorisë së Gjykatës Penale Ndërkombëtare një grup tjetër provash se Rusia kreu krime kundër njerëzimit në Krime. Deklarata e dymbëdhjetë përmban dëshmi të persekutimit sistematik të tatarëve të Krimesë në baza politike, etnike dhe fetare në gadishull”, njoftoi në Facebook prokurori i Republikës Autonome të Krimesë dhe qytetit të Sevastopolit, Igor Ponochovny.
Siç thuhet, që nga viti 2014, pothuajse 30,000 tatarë të Krimesë janë detyruar të largohen nga gadishulli për shkak të kushteve të padurueshme të jetesës, ngacmimeve, etj. Njëzet e dy aktivistë u rrëmbyen ose u zhdukën. Të paktën 18 tatarë të Krimesë u torturuan.
Të burgosur politikë
Sipas Ponochovny-t, më shumë se 200 persona janë ndjekur penalisht në Krimenë e pushtuar që nga viti 2014 për arsye politike dhe të paktën 136 mbahen si të burgosur politikë, transmeton Ukrinform.
Në të njëjtën kohë, 75 për qind e kërkimeve të kryera nga pushtuesit në Krime ishin të lidhura me tatarët e Krimesë, të cilët së bashku përbëjnë pothuajse 83 për qind të të gjithë të arrestuarve.
Prokurori i Republikës Autonome të Krimesë përmendi se të paktën 50 aktivistë tatarë të Krimesë në gadishull morën një “paralajmërim” për të mos marrë pjesë në ngjarjet me rastin e Ditës së Flamurit Tatar të Krimesë.
Ponochovny thekson se “Rusia dhe administrata e saj pushtuese shkelin sistematikisht të drejtat e popullit autokton të Krimesë – tatarëve të Krimesë – duke u përpjekur të shtypin rezistencën e qytetarëve ukrainas që nuk pajtohen me pushtimin dhe u kujtojnë grupeve jobesnike pasojat e kundërshtimit të pushtimit të Rusisë”.
26 qershori shënon Ditën e Flamurit Tatar të Krimesë. /tesheshi.com/
