Është provuar tashmë se në Shqipëri nuk janë standardet politike apo sociale ata që sjellin rebelimin e njerëzve, por “xhepi”. Është ky që udhëheq ndërgjegjet.
Kështu ndodhi dhe së fundi me kuksianët, të cilët e kanë lexuar 5 euroshin e Rrugës së Kombit si rrjepje që u bëhet. Mirëmbajtja e rrugës? Vështirë ta lëxojnë kështu. Janë nervozë, të stresuar, të dërrmuar psiqikisht. Dhe sigurisht të paformuar, e jo vetëm ata, deri në pikën që ta gëlltisnin çështjen e mirëmbajtjes. Dhe kjo ndodh në një Kukës, ku vërtet Rilindja ka lënë gjurmë, duke nisur që ekipi i futbollit me një mbështetje politike indirekte, si dhe me transforimin urban në disa zona të qytetit. Por fakti që nuk e patën për gjë që të sulmojnë e shkatërrojnë dhe pronën e Shefqet Kastratit, tregon shumë, pra që nuk durojnë dot t’i prekësh te “xhepi”, apo më ndryshe “te stomaku”.
Kështu ka ndodhur në rebelimet e periudhës së Zogut, duke përdorur pikërisht gjendjen ekonomike. Partia Komuniste i nxirrte njerëzit në demostrata jo për standarte por për bukë. Edhe komunizmi si sistem u rrëzua kur njerëzit ishin të uritur tregu ishte bosh.
Rebelimi i ’97-ës ndodhi gjithashtu kur u prek xhepi, dhe Berisha i mirë u kthye sakaq i keq në pak muaj.
Sot, po të shohësh faqen e facebook të kryeministrit Rama, vëren që dhe njerëz që e mbështesin i thonë që të ulë tarifën pasi “5 euro është shumë”.
Dhe nga ky zhvillim është rasti për të kujtuar një precedent, atë të vitit 1992, kur qeveria demokrate “Meksi”, riti drastikisht çmimin e bukës.
Ishte një rritje shokuese por brenda logjikës së ekonomisë së tregut. U rrit 100 për qind brenda ditës duke sjellë një traumë sociale në vend kryesisht në pjesën më të varfër të popullsisë. Kjo bëri që PD pak muaj pas fitores plebishitare të 22 marsit, të ndëshkohej me vote në zgjedhjet lokale.
Shumë analiza u bënë atëherë për këtë rezultat të papritur, ku u futën si shkaqe përçarja e PD-së apo largimet masive nga puna nëpërmjet ligjit famëkeq 24/1, por realisht akti më i bujshëm që ndikoi në tronditjen e besimit të elektoratit ishte vendimi i qeverisë për të liberalizuar çmimet, ku veçonte ai i bukës.
Më shumë tronditja erdhi psikologjikisht, pasi me kalimin e muajve liberalizimi solli rritjen e të ardhurave deri në pikën sa ai çmim duket tejet normal. /tesheshi.com/
