Ministria e Drejtësisë përmes një reagimi ka sqaruar udhëzimin që ka hyrë në fuqi mbi tarifat e reja të përmbaruesve gjyqësorë privatë.
Përmes një deklarate, Ministria e Drejtësisë sqaron se tarifat përmbarimore janë miratuar bazuar në ndryshimet me konsensus që i janë bërë Kodit të Procedurës Civile dhe ligjit për përmbarimin gjyqësor privat dhe shtetëror në fund të vitit 2016.
Miratimi i këtyre udhëzimeve ishte i detyrueshëm, për shkak të afateve që parashikonte ligji (1 muaj nga hyrja në fuqi e tij) dhe nevojës për të zbatuar rregullat e reja të tarifimit që parashikonin ndryshimet konsensuale në ligj.
“Udhëzimet në fjalë kanë qenë një praktikë e mbartur në Ministrinë e Drejtësisë/Ministrinë e Financave dhe i janë nënshtruar një procesi të gjerë konsultimi, duke filluar nga muaji Janar 2017 e në vijim. Këto udhëzime janë nënshkruar për herë të parë në versionin e miratuar, nga Ministri i Drejtësisë më datë 13 Prill 2017.
Krahasuar me tarifat e përcaktuara në vitin 2009, nga 9 nivele tarifimi, tre prej tyre kanë mbetur të pandryshuara apo janë ulur; 5 tarifa kanë pësuar rritje dhe 1 tarifë është reduktuar në vlerë kufiri”, thuhet në sqarimin e Ministrisë së Drejtësisë.
Sipas këtij institucioni, tarifat e reja pritet të nxisin ekzekutimin vullnetar të detyrimeve, duke zeruar në këtë mënyrë kostot për ekzekutimin e titujve ekzekutiv për qytetarët dhe bizneset.
Në çdo rast, sipas ligjit, tarifat përmbarimore edhe pse parapaguhet nga kreditori, nuk i ngarkohet këtij të fundit, por i vilet debitorit së bashku me detyrimin.
Në mbrojtje të interesave të grupeve në nevojë, udhëzimet e reja kanë zgjeruar kategorinë e personave që përjashtohen nga pagesa e tarifës përmbarimore, duke çliruar nga detyrimi për të paguar të gjithë personat që janë në kushtet e paaftësisë paguese, që trajtohen me ndihmë ekonomike apo që përfitojnë nga ligji për ndihmën juridike falas. /tesheshi.com/
