Pas pakënaqësive të shprehura nga kosovarët për tarifën e Rrugës së Kombit, zv.kryeministri, Fatmir Limaj ka thënë pas takimit që ka zhvilluar të mërkurën me kryeministrin shqiptar, Edi Rama të ketë parë vullnet te ky i fundit për të gjetur një modalitet të tarifës që nuk do ta rendonte qarkullimin e njerëzve dhe mallrave në këtë rrugë.
“Të njëjtin vullnet e pashë edhe në takimin e përbashkët që pata me kryetarin e Kuvendit të Shqipërisë, ministrin e Financave dhe Shefin e Grupit Parlamentar të Partisë Socialiste. Unë pres shumë shpejt qe qeveria shqiptare të dalë me një modalitet i cili merr në konsideratë interesat e biznesit Kosovë-Shqipëri dhe shqetësimet e qytetarëve”, shkruan Limaj në Facebook.
Kujtojmë se për veturat çmimi për vajtje ardhje në Rrugën e Kombit është caktuar 10 euro, çka ka ngjallur jo pak reagime jo vetëm tek kosovarët, por edhe tek kuksianët që ditë më parë protestuan dhe dogjën kabinat e vendosura për pagesën e tarifës. /tesheshi.com/
