Kryetari i Listës Serbe, Goran Rakiç, paralajmëroi por dhe kërcënoi njëkohësisht me bllokimin e rrugëve në veri të Kosovës, nëse nis konfiskimi makinave me targa serbe më 31 tetor, siç ka paralajmëruar qeveria në Prishtinë .
“Ne do të bllokojmë të gjitha vendkalimet dhe hyrjet nga veriu drejt Kosovës qendrore”, tha Rakiç në një konferencë për media në Beograd.
Rakiç tha se nga presidentit Vuçiç i është thënë se nëse “Forcat e Sigurisë së Kosovës, njësitë speciale të policisë apo dikush tjetër fillon të konfiskojë pronën tonë dhe prona tona janë pikërisht targat që janë arsyeja e takimit, ne do të përdorim të gjitha mjetet në mënyrë demokratike dhe paqësore, për të rezistuar dhe do të jetë rezistenca e popullit”.
“Kur themi rezistencë paqësore demokratike të popullit, ne me të vërtetë atë e duam, por nuk e di se në çfarë do të shndërrohet e gjitha dhe si do të zhvillohet situata në terren”, tha zyrtari serb i Kosovës, duke lënë të nënkuptuar ndezjen e situatës,
“As unë nuk e di dhe askush nga ne që jetojmë atje poshtë se në çfarë do të shndërrohet situata nëse dikush me dhunë fillon të na marrë pronën”, shtoi ai, duke pretenduar se qeveria Kurti po ju bën padrejtësi.
Për kryeministrin e Kosovës, thjesht po zbatohet ligji dhe parimi i reprocitetit. /tesheshi.com/
