Unë do t’i përkushtohem inkurajimit të procesit integrues, i cili bazohet në radhë të parë në respektimin e vlerave evropiane, tha eurodeputetja italiane.
Eurodeputetja italiane Alessandra Moretti është zgjedhur kryetare e re e delegacionit evropian të Komitetit Parlamentar për Stabilizim dhe Asociim të Serbisë në BE (POSP).
Ajo zëvendësoi Tanja Fajon, e cila iu bashkua qeverisë në Slloveni pas zgjedhjeve të prillit dhe u bë zëvendëskryeministre dhe ministre e Jashtme.
“Faleminderit për besimin që do t’ju kthej me angazhimin tim për të inkurajuar procesin e integrimit, i cili bazohet kryesisht në respektimin e vlerave evropiane”, ka shkruar Moretti në Twitter.
Moretti, një eurodeputete nga Grupi i Socialistëve dhe Demokratëve në PE (S&D), si kryetare e Delegacionit të PE për Serbinë, do të bashkëkryesojë POSP me homologun e saj serb.
Ajo në faqen e Delegacionit për marrëdhënie me Serbinë ka shkruar se POSP takohet dy herë në vit, por se puna e tyre mbulon të gjitha aspektet e anëtarësimit të Serbisë në BE.
“Ne do të fokusohemi veçanërisht në funksionimin e institucioneve demokratike, përmirësimin e mjedisit zgjedhor dhe dialogut ndërpartiak, mbrojtjen e të drejtave themelore, bashkëpunimin rajonal dhe dialogun ndërmjet Beogradit dhe Prishtinës”, thuhet në uebfaqen e delegacionit.
Delegacioni, siç u tha, kërkon të ndihmojë Serbinë të përgatitet për anëtarësimin në BE dhe të punojë së bashku në një udhërrëfyes ambicioz për pranim. /tesheshi.com/
