Një nga talentet shqiptare të Zvicrës në futboll, Adrian Bajrami, “u betua” t’i qëndrojë besnik gjakut në zgjedhjen e tij se me kë kombëtare do të luajë. Do të jetë pjesë e kuqezinjve e jo e helvetëve.
Lojtar i Benfikës, i cilësuar “talent premtues” në atdheun e Ronaldos, Bajrami u betua së bashku me 10 shtetas të tjerë, para kryetarit të Bashkisë së Tiranës, Erion Veliaj, për besnikëri ndaj shtetit shqiptar, duke zgjedhur kombëtaren shqiptare para asaj të Zvicrës, madje as të Kosovës.
Në ceremoninë e betimit për marrjen e nënshtetësisë shqiptare, kryebashkiaku Veliaj tha se ky akt shënon një lloj dakordësie për të punuar si një skuadër për emancipim dhe zhvillim.
“Ky akt nuk është vetëm nënshkrimi i një shtetësie, është edhe dakordësia jonë e përbashkët se do jemi pjesë e një misioni, do jemi pjesë e një skuadre, e një beteje për emancipim, progres dhe për zhvillimin e vendit dhe të kombit tonë. Sot fillon një rrugë e re, një rrugë ku do të jemi të gjithë bashkë, me miliona të tjerë, për ta bërë këtë vend më të bukur, për ta bërë këtë komb më të ndritur, edhe për ta lartësuar të gjithë atë që është qenia shqiptare”, deklaroi Veliaj.
Teksa nënvizoi se destini i qytetit është zhvillimi dhe rritja e tij, Veliaj u shpreh se Tirana u ofron të gjithëve shansin për të ndërtuar të ardhmen e tyre.
Pas leximit të formulës së betimit nga ai si Kryetar i Bashkisë, shtetas nga Zvicra, Kosova, Turqia dhe Egjipti nënshkruan edhe aktin e betimit, duke u bërë kësisoj shtetas shqiptarë. /tesheshi.com/
