Munzer Khattab i përngjason burokracia me një lojë gjarpërinj e shkallë. Kur 23-vjeçari nga Latakia, qytet në bregun sirian mbërriti dhe u regjistrua në Berlin vitin e shkuar, atij iu dha adresa e një zyre pune në një pjesë tjetër të qytetit. Por kur ai shkoi në këtë adresë, ndërtesa ishte mbyllur për rinovim. Ai ndeshi me zyrën zëvendësuese rastësisht rreth dy javë më vonë.
“Në Siri, ka gjithnjë një mënyrë për të shmangur burokracinë, qoftë edhe kur kjo do të thotë të paguash pak para më shumë. Këtu nuk ka asnjë mënyrë që të shmangësh ndonjë zyrë për dokumentet”, thotë Khattab.
Miku i tij, Ghaith Zamrik, 19-vjeçar nga Damasku kishte probleme të ngjashme. Pasi kishte mbërritur në Berlin, atij i ishte thënë të nënshkruante tetë dokumente, por vetëm katër prej tyre ishin të përkthyera në arabisht. “Ishte shumë frustruese”, thotë Zamrik. “Madje, edhe miqtë gjermanë kanë probleme me plotësimin e dokumenteve këti – imagjinoni sesi mund të jetë për një të sapoardhur”.
Të nxitur nga këto probleme, Khattab dhe Zamrik kanë marrë përsipër misionine thjeshtësimit të burokracisë gjermane jo vetëm për 1.2 milionë njerëzit që kanë kërkuar azil në këtë vend që prej vitit 2013, por edhe për qytetarët e zakonshëm gjermanë. Që nga marsi, ata dhe një ekip i përbërë nga katër refugjatë të tjerë sirianë po zhvillojnë një aplikacion të quajtur Bureaucrazy, që premton për të sapoardhurit dhe vendasit një guidë në labirinthin e mbushjes së formularëve dhe noterizimit të tyre.
Aplikacioni po zhvillohet tek ReDI, një|organizatë jofitimprurëse në Berlin apo “një shkollë për integrimin dixhital” që u mëson azilkërkuesve sesi të kodojnë.
Bureaucrazy synon të kombinojë tre funksione themelore: shërbimin e përkthimit që i kthen dokumentete zyrtare gjermane në arabisht dhe anglisht, një pemë që tregon vendimet që duhen marrë për problemet që hasen më shpesh me dokumentet, si dhe harta e shërbimeve që i dërgon aplikantët drejt e në zyrën e duhur.
Ndërsa programi është ende në zhvillim, grupi po kërkon mbështetje për kodimin dhe mbështetje financiare në mënyrë që ta lançojnë më 1 janar të vitit të ardhshëm. Në rastin më të mirë, ata shpresojnë se produkti i tyre do të drejtojë ata që mbërrijnë në Gjermani përmes gjithçkaje, nga hapja e llogarive bankare, marrja me qira e një apartamenti, aplikimi për një kurs universitar apo regjistrimi në qendrën e punës.
Një valë sulmesh terroriste në Bavari, së fundi, ka hedhur një hije të zymtë mbi qëndrimin e kufijve të hapur të kancelares Angela Merkel gjatë krizës së refugjatëve.
Themeluesja e ReDI, Anne Kjær Riechert, thotë se shpreson që projekte si Bureaucrazy do të mund të ndihmojnë gjermanët të kuptojnë se kriza e refugjatëve ka sjellë gjithashtu, edhe talente të mëdha në vendin e tyre.
“Nëse ne duam të ndihmojmë njerëzit e bllokuar në kampet e refugjatëve në të gjithë botën apo që trafikohen, kemi nevojë të përforcohemi dhe të bashkëpunojme me njerëz si Munzer and Ghaith. Ata e njohin situatën nga vetë eksperienca e tyre dhe për këtë arsye mund të jenë pjesë e ndërtimit të zgjidhjeve efikase”, thotë ajo.
Khattab dhe Zamrik, të cilët që të dy kanë ndërprerë studimet në Siri për të shmangur shërbimin ushtarak, thonë se rruga drejt përfundimit të aplikacionit do ende kohë. Prototipi i Bureaucrazy përdor një shërbim përkthimi të mundësuar nga Yandex, përgjigja ruse ndaj Google-it, edhe pse algoritmet ndonjëherë nuk gjenden mirë me fjalët gjermane. Togfjalësha si Polizeiliche Meldebescheinigung (“karta që tregon se jeni regjistruar në polici”) apo Untervermietungserlaubnis (“leje për marrje me qira”) ende bëjnë që djemve t’u vijë mendja vërdallë në dëshpërim.
Kur ata e paraqitën projektin e tyre në samitin “Startup Europe” në qershor, ata u mbuluan nga një pritje pozitive dhe mbështetëse. “Shumë rumunë e spanjollë na thanë se kanë nevojë për një aplikacion të ngjashëm. Dhe ne kemi menduar se dokumentet ishin një problem vetëm për refugjatët”, tha Khattab për gazetën “The Guardian”.
Që aplikacioni të punojë në mënyrë efikase, Bureaucrazy duhet të ruajë informacione dhe të vetëplotësojë formularë për përdoruesit e regjistruar – një rrezik madhor sidomos në një vend si Gjermania ku janë shumë të vetëdijshëm për mbrojtjen e të dhënave. “Gjermanët janë vërtet të kujdesshëm kur bëhet fjalë për privatësinë e tyre”, thotë Zamrik.
Të rinjtë me gjasa do të duan ta financojnë aplikacionin me mbledhje fondesh, por edhe në këtë rast nuk janë të sigurtë se ku do t’i mbajnë fondet e tyre edhe nëse ia arrijnë të mbledhin mjaftueshëm para. Nëse mbledhin më shumë se 700 euro në llogarinë e tyre, ata do të jenë në telashe me zyrën e punës. Aplikacioni i tyre për bankim online deri më tani është refuzuar.
Përgatiti: Juli Prifti – /tesheshi.com/
