Talat Xhaferi, kreu i ri i parlamentit maqedonas, njëherësh i pari shqiptar në këtë post të lartë shtetëror, ka thënë se mbajtja e seancave në gjuhën shqipe nuk e cenon integritetin apo unitarietin e shtetit, siç është dhënë alarmi nga VMRO apo vetë Presidenti Ivanov.
“Në këtë drejtim besoj se do të ketë edhe mirëkuptim prej kolegëve, pa marrë parasysh reagimet e mundshme. Besoj se ajo në instancë të fundit nuk është në dëm të Maqedonisë, nuk cenon në asnjë mënyrë statusin në kontekst të asaj çka është sovraniteti dhe integriteti i Maqedonisë në kuptimin e përcaktimit kushtetues, për shkak se bëhet fjalë për të drejtat e qytetarëve të Maqedonisë të parapara edhe me konventat ndërkombëtare”, deklaron Xhaferi gjatë një interviste për Anadoly Agency.
Po ashtu, Xhaferi ka paralajmëruar se nëse brenda 10 ditëve, Ivanov nuk e jep mandatin për formimin e qeverisë së re, atëherë këtë proces do e kryejë Kuvendi.
“Për praktikën parlamentare nuk do të ishte mirë që kreu i shtetit të mos përmbushë obligimin e tij për shkak se do të bënte praktikë të keqe parlamentare në të ardhmen, sepse mbi atë praktikë do të mundësonte që edhe kryetarët e radhës të shtetit do të ishin në mundësi të shfrytëzonin një praktikë, e cila është praktikë e keqe, por e përdorshme dhe e mundshme në të ardhmen nëse Ivanov vendos në këtë drejtim të lëvizë kundrejt obligimeve të veta”, theksoi kryeparlamentari i Maqedonisë, duke e bërë të qartë se ashtu siç u zgjodh vetë, po ashtu do zgjidhet edhe qeveria me në krye Zaevin; pra duke e bërë gjithçka fakt të kryer. /tesheshi.com/
