Eshtë bërë dhe më delikate situata politike në Kosovës, e kjo pasi një varg reagimesh të hidhura nga Uashingtoni, ku paralajmërohet tërheqja e trupave amerikane nga Kosova, nëse vijon të mos hiqet taksa plotësisht, siç kryeministri Albin Kurti nuk e pranon si direktivë amerikane.
Së fundi ka qenë anëtari i Kryesisë së LDK-së, njëherësh ish-ministri i Jashtëm në periudhën e parë të pavarësisë Skënder Hyseni, i cili përcolli një mesazh të ashpër të të dërguarit Grenell, pas një takimi mes të dyve në Uashington.
“Amerika nuk mund ta mbrojë Kosovën nga vetvetja, përkatsisht nga sjelljet e papërgjegjshme të Qeverisë dhe liderëve të saj, ishte mesazhi i Ambasadorit Grenell, duke shtuar se Amerika nuk mund të vazhdojë të shpenzojë qindra miliona dollarë për ushtri dhe ndihma e projekte tjera në një vend ku qeveria punon kundër interesave të qytetarëve të saj”, shkroi Hyseni, mesazh që pason atë të djalit të presidentit Trump, i cili gjithashtu paralajmëroi të njëjtën gjë.
“Pajtohem. Janë rreth 650 trupa amerikane në Kosovë. Ka ardhur koha t’i kthejmë ata në shtëpi”, shkroi Donald Trump Jr.
Ka patur një reagim të menjëhershëm dhe nga presidenti Thaç, i cili i kërkoi qeverisë që të mos vijojë më tej me kokëfortësi.
“Si President i Republikës së Kosovës i kërkoj urgjentisht Qeverisë së Republikës së Kosovës, që të mblidhet dhe të marrë vendime në përputhje me kërkesat zyrtare të Shteteve të Bashkuara të Amerikës. Mjaft e keni cenuar lidhjen tonë speciale me SHBA-në, pa të cilën nuk do ta kishim as lirinë, as shtetin dhe as të ardhmen. Me këtë qasje po vihet në pikëpyetje edhe vetë e ardhmja e shtetit tonë.
Të gjithë ne, krerë institucionesh, liderë politikë apo qeveri, jemi të zëvendësueshëm. Por, jetike dhe të pazëvendësueshme për Republikën e Kosovës janë vetëm raportet me SHBA-në. Konfrontimi me SHBA-në është shumë i dëmshëm dhe një gabim i pafalshëm në historinë moderne të Kosovës”, shkroi Thaçi.
I tillë u tregua dhe Isa Mustafa, partner në koalicion me Albin Kurtin.
“Si kryetar i LDK-së jam deklaruar qartë për heqjen e pakusht të tarifës , ndërkaq që reciprociteti të dakordohet me SHBA dhe BE, varësisht nga sjellja e Serbisë. Ky eshte qendrimi dhe zëri i LDK-së.
Konsideroj se nuk ka zë të popullit në Kosovë që rrezikon dhe i vë në pikëpyetje relacionet me SHBA.
Jam në komunikim me Ambasadorin Grenell. E kam dërguar një zyrtar të lartë të LDK-së të bisedojë drejtpërdrejti me te, të informohet për takimin e fundit të Presidentit Thaçi dhe Vuqiç në Ëashington dhe t’ia prezantojë qëndrimet e LDK-së.
Do të bashkëbisedojë me Kryeministrin Kurti, si partner i koalicionit, dhe si LDK në ditët në vijim do ti bëjmë të qarta veprimet të cilat e ruajnë partneritetin dhe miqësinë me SHBA-të”, shkroi Mustafa.
Ndërkohë, deri më tani, Albin Kurti që vijon të sfidojë thirrjet amerikane, ka deklaruar se nuk do ketë antagonizma mes Kosovës dhe SHBA. /tesheshi.com/
