I dërguari i presidentit Trump për dialogun, Richard Grenell, ka mohuar sërish dhe me forcë që të ekzistojë një plan i fshehtë për ndarjen e Kosovës, siç ka pretenduar kryeministri i rrëzuar Albin Kurti. Në një intervistë për T7 në Prishtinë, Grenell iu tregua këmbëngulës për këtë.
“Kurrë. Kurrë nuk është ngritur si çështje në praninë time dhe siç thashë, kjo nuk është diçka që e kam parë ose që është folur për të dhe meqë ra fjala, më lejoni të jem shumë i qartë. E kam thënë këtë më parë. E kemi thënë këtë në Tëitter, kemi lëshuar deklarata për medie, kur ato kanë kërkuar. Kjo nuk është hera e parë që kemi qenë të qartë se këto thashetheme janë thjesht kaq, janë thashetheme”, ka thënë Grenell.
Ndërkohë, ai pretendoi se Kurti i ka premtuar heqjen e taksës, duke dhënë të kuptuar kështu se nuk e ka mbajtur fjalën.
“Ai më shikoi në sy dhe tha se ata do ta largojnë taksën”, ka theksuar diplomati amerikan, duke arsyetuar se taksa ka dëmtuar rëndë ekonominë kosovare në radhë të parë.
“Prandaj, për ne nuk ka kuptim që të ketë politika që janë duke e dëmtuar ekonominë, që nuk i lejojnë bizneset të lëvizin përpara dhe të krijojnë vende pune. Kjo i prek të rinjtë që duan vende pune dhe kur politikat e dëmtojnë vetë ekonominë, nuk duhet të pritet nga ne, Shtetet e Bashkuara, që të vazhdojmë t’i përkrahim politikat që janë duke i dëmtuar njerëzit dhe aktivitetin e krijimit të vendeve të punës”, ka shtuar Grenell.
Por Kurti e ka rrëzuar pretendimet tij, duke dhënë versionin e vet shoqëruar me detaje vendi e kohe.
“Me ambasadorin amerikan në Berlin, z. Richard Grenell, jam takuar dy herë. Takimi i parë ishte më 9 tetor 2019, në ora 13:45, në Ambasadën e ShBA-ve në Prishtinë. Takimi i dytë ishte më 23 janar 2020, në ora 10:30, në selinë qendrore të LVV. Në takimin e parë me mua ishte z. Glauk Konjufca. Në takimin e dytë me mua ishin z. Glauk Konjufca dhe znj. Fitore Pacolli-Dalipi.
Të dy herët, z. Grenell e kam shikuar në sy. Por, asnjëherë nuk i kam thënë që do ta heqim tarifën 100% pa reciprocitet. Është për t’u përshëndetur dhe inkurajues deklarimi i qartë i sotëm i ambasadorit Grenell kundër planeve për shkëmbim territorial”, shkroi Kurti. /tesheshi.com/
