Taksa doganore ndaj Serbisë, shenjat e para të një përplasjeje Thaçi – Haradinaj

Një përplasje ka nisur mes presidentit Thaçi dhe qeverisë së Kosovës, ndonës për momentin pa protagonizmin e Haradinajt, lidhur me taksën doganore ndaj Serbisë.

Deri më sot, kreu i shtetit kosovar ka qëndruar mënjanë duke mos u përzier në vendimin e kabinetit Haradinaj për ta ndëshkuar Beogradin ekonomikisht në emër të synimeve politike, por një deklaratë e Thaçit për The Washington Post të premten, duke thënë se është “gati të shqyrtojë heqjen e tarifave që për  Kosovën të hapet një rrugë e qartë drejt arritjes së një marrëveshjeje finale paqësore me Serbinë”, ka detyruar njeriun që e propozoi taksën, ministrin e Tregtisë dhe Industrisë Endrit Shala, të thotë se presidenti Thaçi nuk mund të jap premtime të tilla, sepse siç deklaroi ai, taksën e ka vendosur qeveria me propozimin e tij si ministër dhe jo presidenti.

“Përderisa ekzistojnë arsyet të cilat neve si qeveri e Republikës së Kosovës na kanë shty me vendosë këtë taksë, do të thotë arsyet të cilat unë i kam prezantuar kur e kam propozuar vendimin për këtë taksë, atëherë asnjëherë kjo taksë nuk do të eliminohet”, ka deklaruar ministri Shala. /tesheshi.com/