Presidenti Hashim Thaçi nuk ka treguar qëndrim të unifikuar lidhje me taksën e vendosur ndaj Serbisë dhe Bosnje Hercegovinës.
Kështu, presidenti paradite e kishte mbrojtur taksën, por pasdite i kishte kërkuar kryeministrit që ta heqë atë. Së paku ky është qëndrimi i kryeministrit të Kosovës Ramush Haradinaj.
Ai ka bërë të ditur se kërkesat për pezullim të taksës, janë bërë jo vetëm nga Merkel e Macron, por edhe nga Rama e Thaçi.
Haradinaj ka konfirmuar edhe më tej rëndësinë e samitit, pasi, sipas tij, ka treguar investim serioz në çështjen e dialogut Kosovë – Serbi. Megjithatë, ai e quajti dialogun si një përpjekje të devijuar.
Haradinaj tha se në samit ka rikonfirmuar qëndrimin kundër hapjes së temës së kufijve, por nuk mundi ta thotë të njëjtën edhe për presidentin francez, Emanuel Macron.
Gjithashu, çështjen e liberalizimit ai e lë në duar të “fatit”, duke thënë se kjo varet nga kush fiton zgjedhjet në Parlamentin Europian.
Pas samitit, në një komunikatë të lëshuar nga Zyra e kancelares Merkel, është thënë të ketë pasur një pajtim mes Prishtinës e Beogradit, që të vazhdojnë përpara me tentimet për zbatimin e marrëveshjeve ekzistuese.
Pas Berlinit, një takim i ngjashëm është paralajmëruar për në korrik, tani në Paris, me ftesën e presidentit Emmanuel Macron. /tesheshi.com/
