Kryeministri Edi Rama ishte i pranishëm sot në Samitin e Podgoricës, ku merrnin pjesë Kryeministrat e vendeve të Rajonit, si dhe zv.Presidenti amerikan, Mike Pence.
Kreu i Qeverisë shqiptare ka zhvilluar një takim të veëantë me zv.Presidentin amerikan, por edhe me homologët e tij nga vendet e Rajonit, ndërsa përmes një postimi në rrjetet sociale pasqyron detaje nga bisedat e zhvilluara.
“Në Mal të Zi me zv.Presidentin e SHBA, Mike Pence, dhe liderët e rajonit tonë për Samitin e Kartës së Adriatikut. Zv.shefi i Shtëpisë së Bardhë nënvizoi fort, interesin e Shteteve të Bashkuara për të forcuar bashkëpunimin me vendet e rajonit, si edhe domosdoshmërinë për të rritur ndërveprimin mes SHBA e vendeve të rajonit e po ashtu mes vetë vendeve të rajonit, në funksion të përballimit me sukses të sfidave të sigurisë, paqes e prosperitetit, në rajon e në Europë.
Takimet bilaterale me zv.Presidentin Pence, si edhe me liderët e tjerë të rajonit, patën rëndësinë e tyre të posaçme për rikonfirmimin e vullnetit për të ecur më tej përpara, të gjithë së bashku, në mbrojtje të interesave strategjike të popujve tanë.
Në takimin me Kryeministrin kroat, Plenkovic, u përcoll edhe ndjeshmëria e lartë e opinionit publik mbarëshqiptar për rastin e Ballist Morinës dhe u theksua nevoja për zgjidhjen më të arsyeshme të tij”, shkruan Rama në faqen e tij në rrjetet sociale. /tesheshi.com/
