Nga Blendi Gashi
Takim i përzemërt, thellim i marrëdhënieve të miqësisë Kosovë-SHBA, mbështetje për rrugën euroatlatike…janë disa nga pikat kyçe me të cilat Zyra e kryeministrit Haradinaj e përshkruan takimin e këtij të fundit me zv.ndihmës sekretarin e Shtetit të SHBA-së, Hoyt Brian Yee, po ku nuk përmendet Demarkacioni, një prej çeshtjeve më të mprehta të raporteve të Prishtinës zyrtare me faktorin ndërkombëtar.
Sipas Kryeministrisë, mesazhi kryesor që Yee i ka dhënë Haradinajt është se “SHBA-ja do të vazhdojë ta mbështesë Kosovën në të gjitha proceset e saj dhe se rruga e integrimeve evropiane për Kosovën dhe për vendet e rajonit është e hapur dhe inkurajoi institucionet që të angazhohen në thellimin e reformave të brendshme, në fushën e sundimit të ligjit dhe në promovimin e zhvillimit ekonomik”.
Po Demarkacioni ku është? Ngjan sikur nuk është cekur fare,por që orë më vonë do vërtetohej e kundërta, çka e nxjerr paksa lakuriq një të vërtetë që Zyra e kryeministrit kosovar ngjan sikur ka dashur, ose ka dashur vërtet ta fshehë.
Ja ç’tha Yee për Zërin e Amerikës. “Ne e inkurajojmë qeverinë e Kosovës që të shfrytëzojë këtë mundësi, aty ku qeveria e fundit nuk ishte në gjendje ta shfrytëzojë dhe ta ratifikojë marrëveshjen në parlament dhe të përfitojë, me pëlqimin e Bashkimit Evropian, nga udhëtimi pa viza. Ne besojmë se është e mundur. E kuptojmë që marrëveshjet si kjo, çështjet që përfshijnë kufijtë, marrëdhëniet me fqinjët, janë nganjëherë të ndërlikuara. Por, ajo që mendojmë se është e domosdoshme, është që publiku të kuptojë se çfarë do të arrijnë, përfitimet për të në jetën e përditshme duke ratifikuar marrëveshjen dhe pastaj udhëtimin pa viza. Është po ashtu me rëndësi për udhëheqësit e këtij vendi që të marrin përgjegjësinë, të dëshmojnë udhëheqësinë e nevojshme, të sigurojnë shumicën e domosdoshme në parlament për të ratifikuar marrëveshjen. Pra, kombinimi i vetëdijes së publikut, që është natyrisht përgjegjësi e udhëheqësve, por po ashtu edhe medies, politikanëve, anëtarëve të parlamentit, që të sigurohen se publiku e kupton se për çfarë flitet dhe pastaj që udhëheqësit të marrin përgjegjësinë si përfaqësues të zgjedhur të popullit”, tha pra zyrtari amerikan në VOA.
Sigurisht kjo deklaratë e Hoyt Yee-së flet shumë më shumë se deklarata e thatë e qeverisë, gjë që tregon qartë se Demarkacioni ka qenë tema kyçe e takimit.
Po si shpjegohet kjo? Thjesht fare: Haradinaj, i përbetuari në kushte opozite që Demarkacioni nuk kalon, tashmë është në pozitën e atij që duhet ta kalojë, me hir e pahir. /tesheshi.com/
