Nga Blendi Gashi
Deputetët e dorëhequr në Vetëvendosje, përfshirë edhe kryetarin Visar Ymeri, pritet të takohen të hënën në atë që quhet takimi i parë i përbashkët pas krizës për ta tejkaluar atë.
Dy krahët pas akuzave të ndërsjella nga Facebooku do shihen sy më sy, ku pritet një përplasje mes Albin Kurtit në njërën anë dhe Daradan Molliqajt e Visar Ymerit nga ana tjetër.
Ky takim do jetë përcaktues për fatin e të dorëhequrve ku u mbeten dy zgjidhje: të qëndrojnë në parti duke pranuar Kurtin si kryetar, ose do largohen për të formuar një parti të re, me ç’ka do formojnë një grup parlamentar plus në Kuvendin e Kosovës.
Se ç’do të ngjajë realisht në Vetëvendosje në takimin vendimtar të së hënës mbetet e paqartë, por referuar deklaratave të krahut anti-Kurti, gjasat që të ketë një pajtim dhe të ecet tutje së bashku janë tejet minimale.
Këtë e forcon sidomos vet Dardan Molliqaj i cili edhe pse takimin e Kryesisë me Grupin Parlamentar e ka mirëpritur, i ka vënë zjarrit paksa benzinë duke kritikuar Albin Kurtin për të cilin ka thënë se ka abstenuar rreth takimit në fjalë, duke lënë të kuptohet se ai nuk do ta pranoi si kryetar.
“Lajm shumë i mirë për Lëvizjen, aktivistët e saj si dhe për të gjithë simpatizuesit tanë vendimi i djeshëm i Kryesisë së Lëvizjes për takim të përbashkët me Grupin Parlamentar për të gjetur rrugëdalje nga kjo krizë, takim ky në të cilin padyshim se do të marrë pjesë. Falënderoj të gjithë ata që e mbështetën këtë iniciativë në të mirë të Lëvizjes. Vetëm në këtë mënyrë mund t’i tejkalojmë problemet që kemi. Megjithatë, ndihem tepër i zhgënjyer që anëtarja e kryesisë Dejona Mihali votoi kundër këtij propozimi, ndërsa deputetët të cilët janë edhe anëtarë kryesie, Albin Kurti, Albulena Haxhiu dhe Xhelal Sveçla abstenuan dhe nuk votuan pro kësaj iniciative”, shkruan ai në Facebook.
Por Albulena Haxhiu ka mohuar që të ketë abstenuar për takimin në fjalë, duke e quajtur shpifës Molliqajn.
“Dardan Molliqaj paska thënë që unë kam abstenuar për takimin e përbashkët ndërmjet Kryesisë dhe grupit! Kjo është shpifje!
Unë kam përkrahur takimin e përbashkët dhe i kam arsyet për këtë! Nëse edhe 1% ka shansa për unifikim, duhet të punojmë në këtë drejtim e kemi borxh para qytetareve dhe ja kemi borxh Republikës së Kosovës!”, thotë Haxhiu.
“Ta pranojnë Albinin kryetar ose…”
Se është vështirë që të ketë një rezultat nëse të dorëhequrit nuk e pranojnë Albin Kurtin për kryetar të Vetëvendosje-s, e thotë edhe sekretari organizativ i kësaj partie Ismail Kurteshi.
Ai thotë se takimi është thirrur me qëllim që të tejkalohen problemet në parti, ndërsa kritikon të dorëhequrit.
“Takimet ndodhin kur ka shpresë për tejkalim të probleme. Kryesia e ka dhënë edhe një mundësi që të ketë pajtim. Të dorëhequrit kanë lënë vetëm pozitat në Lëvizje nuk janë larguar nga Vetëvendosje. Megjithatë duhet të them se dorëheqja e tyre po i përngjanë një skendari, dhe nuk po më duket të jenë spontane. Ka ndodh një lloj referendum në parti dhe 99 % janë që sitata të zgjidhet përmes statutin të partisë ku e drejta me kandidu nuk mund t’i mohohet askujt. Kadidimi i Albinit për kryetar tashmë është diçka e kryer. Realitetin duhet ta pranojnë dhe duhet të vazhdhet me Albinin kryetar”, thotë Kurteshi për tesheshi.com.
I pyetur se a mund të dëmtohet partia nëse largohet përfundimisht të dorëhequrit, Kurteshi thotë se jo.
“Vetëvendosje nuk do të dëmtohet çkado që mund të ndodhë ndodhë. Mund të ketë dalje por jo ndarje të partisë”, thotë Kurteshi. /tesheshi.com/
