Nga Mensur Krasniqi
Duhej të kalonin 10 ditë nga marrja e mandatit për formimin e qeverisë, që Nikolla Gruevski të ftojë në takim kreun e partisë fituese në bllokun politik shqiptar, BDI-së, Ali Ahmeti.
Por ndryshe nga më parë, ky takim nuk ishte paralajmëruar fare nga subjektet politike përkatëse. Dhe ajo çfarë ka ardhur pas takimit ka qenë një “asgjë” dyshuese. BDI, nëpërmjet një kumtese ka bërë të ditur se “Ahmeti dhe Gruevski kanë biseduar për rezultatet e zgjedhjeve si dhe situatën aktuale politike në Maqedoni”, pa zbuluar asnjë detaj për ndonjë (mos)marrëveshje eventuale për formimin e qeverisë.
“Sot, Kryetari i Bashkimit Demokratik për Integrim (BDI), Ali Ahmeti ka realizuar takim me Kryetarin e VMRO DPMNE-së, Nikolla Gruevski, ku është biseduar për dy çështje të cilat përfshijnë analizën e rezultateve të zgjedhjeve të mbajtura më 11 dhjetor të cilat u vlerësuan si të lira, fer dhe demokratike, si dhe kanë analizuar situatën aktuale politike. Dy liderët këmbyen mendime rreth situatës paszgjedhore si dhe për sfidat e ardhshme në këtë drejtim”, thuhet në komunikatën e BDI-së.
Por dyshohet se ky nuk ka qenë takimi i parë mes tyre këto kohë, dhe se komunikata e zbehtë e BDI-së për opinionin nuk paraqet pasqyrën reale të temës së diskutimit ndërmjet dy liderëve, Gruevskit dhe Ahmetit. Po ashtu, disa zëra analitikë, edhe pse e vlerësojnë takimin si diçka normale, thonë se në asnjë mënyrë nuk duhet që të pranohet një qeverisje e partive shqiptare me VMRO-në, parti e cila shquhet për politikë nacionaliste ndaj shqiptarëve.
Abedin Zymberi, thotë se do e kishte refuzuar takimin po të ishte në vend të Ali Ahmetit. Për të, nuk besohet që BDI do pranojë koalicion me VMRO-në pa u plotësuar kushtet e platformës së përbashkët.
“Po themi se vonimi i takimit të liderëve është strategji e VMRO-së, por aspak nuk dyshoj se ata dy janë takuar dhe më herët, por kjo tani është publike. VMRO ka kompromituar gjithmonë kërkesat tona, sa herë ka vepruar kështu dhe më pas ulet dhe të fton në bisedime. Po të kisha enë në vend të Ahmetit do e kisha refuzuar takimin, derisa Gruevski të vetëdijësohet e të pastrojë fjalorin nacionalist. Besoj që BDI nuk do të pranojë të hyjë në koalicion nëse nuk përmbushen kërkesat e tyre”.
Ndërkaq, Ismet Ramadani thotë se kur nuk do e kishte dashur një koalicion VMRO-BDI.
“Edhe pse u vonua takimi i mandatarit me Ahmetin, ajo sërish ndodhi. Duke pasur parasysh një koalicion qeveritar shumë vite mes tyre, është një takim që janë shtruar më shumë se që thuhet në komunikat, sidoqoftë duhet pritur se çfarë do të ndodhë në ditët në vijim. Personalisht kisha pasur dëshirë definitve të mos ndodhë koalicioni qeveritar mes tyre, por ky do jetë vendim i tyre.
Për Albert Musliun, takimi i vonuar i Gruevskit ka për qëllim të krijojë nebulozitet.
“Kjo situatë është krijuar qëllimisht për të dhënë shenja se ka tension. Gruevski e ka ditë se ku duhet të drejtohet edhe pse e ka shtyrë për 9 ditë takimin. Nuk ka asgjë tragjke meqë mandatari e ka pasë për detyrë këtë dhe nuk e kuptoj pse është pritur 9 ditë, them që është pjesë e një strategjie të tempuar qëllimisht kjo zvarritje. Kjo bisedë ka mundur të bëhet edhe ditën e dytë, por VMRO e ka lënë qëllimisht ditën e 9 që të krijojë nebulozitet”
Nga qëndrimet e kreut të BDI-së deri më tani është thënë se kërkesat e tyre për partnerin e ardhshëm të koalicionit qeveritar do jenë: përdorim të barabartë të gjuhës shqipe në të gjithë territorin, zgjatje të mandatit të Prokurorisë Speciale dhe vazhdimin e procesit të euro-integrimeve.
Ndërsa nga ana tjetër, VMRO vazhdimisht është deklaruar se nuk pranojnë ndryshim të Kushtetutës sa i takon statusit të gjuhës shqipe dhe as zgjatje të mandatit të Speciales, e cila sipas tyre ka anshmëri politike.
Po ashtu të dy partitë, si VMRO-DPMNE-ja, po edhe BDI-ja që para takimit kanë bërë të ditur se negociatat mund të mos sjellin rezultate pozitive.
VMRO-DPMNE ka njoftuar se nuk do të formojnë qeveri me çdo kusht, kurse nga BDI-ja kanë thënë se vazhdon të mbetet i hapur edhe opsioni për qëndrimin e kësaj partie në opozitë. Të dy palët, nuk kanë mohuar as opsionin e zgjedhjeve të reja, në rast të dështimit të gjetjes së një zgjidhje. /tesheshi.com/
