I cilësuar si një nga opozitarët më aktivë, deputeti dhe kreu i partisë Libra, Ben Blushi ndryshe nga kritikët e tjerë, takimin Rama-Merkel e ka parë me një sy tjetër kritik. Në një postim në rrjetin social facebook, Blushi thotë se përpjekjet 500-vjeçare vazhdojnë të mbeten sërish një rrugë e vështirë për t’u arritur, ndërsa u ndal edhe tek retorika e kryeministrit gjatë fjalës së tij, para mediave ndërkombëtare. Madje, ai e krahason atë si një nxënës të paaftë, që nuk i ka bërë detyrat e shtëpisë, çka sipas tij po ua vështirëson shqiptarëve ëndrrën evropiane.
“Nuk kam parë dhe ndoshta nuk do shoh më një Kryeministër më te mërzitur në Ditën e Pavarësisë së vendit të vet. Me sa duket pesha e kriminalizimit të politikës, kanabizimit masiv, mungesës së reformave të qëndrueshme dhe dyshimi tek zgjedhjet e ardhshme po e vështirësojnë ëndrrën europiane të Shqipërisë. Kancelarja e Gjermanisë ishte e qartë, Kryeministri i Shqiperisë nxinte. Dukej si një nxënës i paaftë që ska bërë detyrat dhe është kapur me kopje në provim. Ka ardhur koha të mbajë përgjegjësi që për tre vjet kërkoi të na çojë në Europë jo me punë, por me barcaleta bajate! Sa e hidhur kur ndodh në 28 nëntor! Kemi 500 vjet që jemi nisur dhe s’po arrijmë dot”, thotë Blushi në profilin e tij./tesheshi.com/
