Kreu i PD-së Lulzim Basha po takohen aktualisht me krerët e partive të vogla aleate në opozitë. Takimi vjen pas negociatave të zhvilluara sot në Presidencë me kryeministrin Rama për gjetjen e një zgjidhje.
Mësohet se Basha po i informon aleatët e tij mbi ofertën që kryeministri Rama i ka lënë në tryezë dhe pret përgjigje deri në darkë.
Burime pranë takimit bëjnë të ditur se shumica e aleatëve të Bashës janë për pranimin e kësaj oferte që do t’i hapte rrugë hyrjes së opozitës në zgjedhje dhe do të plotësonte kërkesat kryesore të opozitës; si qeveri me disa ministra teknikë; shtyrjen e zgjedhjeve; rregullime zgjedhore të nevojshme për garantimin e zgjedhjeve të lira, etj..
Një ditë më parë, një nga aleatët kryesorë, kreu i PAA-së Agron Duka, e tha hapur që ai do t’a pranonte ofertën e Brukselit që u bë një javë më parë në Tiranë nga numri dy i PPE-ve dhe zyrtar i lartë i PE-së, David McAllister.
Nga ana tjetër mësohet se aleatët kanë kërkuar prej Bashës që të japë garanci për futjen e tyre në parlamentin e ri duke u garantuar vende fituese në listën e kandidatëve për deputetë të PD-së.
