Saimir Tahiri ka qenë sot në zyrën e Ilir Metës, pikërisht një vit pasi dy politikanët jo vetëm nuk flasin me njëri-tjetrin, por kanë shëmbyer replika me anë të ndërmjetësve, të cilat u janë afruar deri dhe kërcënimeve.
Siç mësohet, për 30 minuta ministri i Brendshëm Saimir Tahiri, ka qenë në zyrën e Kreut të Kuvendit dhe më pas është larguar drejt Gardës së Republikës.
Ilir Meta ka kërkuar largimin e Tahirit dhe këtë e ka bërë çdo dy javë në mënyrë të përsëritur.
Thuhet nën zë se Tahiri ka deklaruar gatishmërinë e tij për t’u larguar si ministër i Brendshëm dhe për t’u kthyer në detyrën e kreut të PS-së së Tiranës, pasi nuk është deputet, por ka refuzuar që të plotësojë një kërkesë shumë, po shumë të rëndësishme për Ilir Metën: i ka kërkuar kreut të LSI-së që të ndalojë presionin ndaj familjarëve të tij dhe përpjekjeve për ta spiunuar.
Katër muaj më parë, një zv/ministër i emëruar nga LSI-ja kishte vendosur përgjues në zyrën e Tahirit.
Mësohet se Saimir Tahiri ka hyrë në zyrën e Metës me një dosje dhe ka dalë pa të.
Nuk dihet se çfarë përmban dokumenti, por aluduhet se bëhet fjalë për një shkresë zyrtare.
Disa media pranë LSI-së kanë hapur lajmin në fillim të javës se Tahiri do të largohet dhe do të emërohet në Ministrinë e Drejtësisë dhe se dikasterin e policisë do ta marrë Luan Rama i LSI-së.
Dikush përmendi edhe Taulant Ballën, ndërsa dy javë më parë u fol edhe për Ilir Metën vetë.
Mos po ndodh rokada?!
Edi Rama, në një intervistë të dhënë për TVSH-në i ka kërkuar kreut të LSI-së, Ilir Meta që të takohen sa më shpejt për të mbyllur çështjen e koalicionit në 2017-ën.
Ndërsa lideri i opozitës, Lulzim Basha deklaroi se nuk e përjashtonte një ardhje të LSI-së në një koalicion me PD-në.
Po atëherë ç’donte Saimir Tahiri në zyrën e Ilir Metës sot?!
Dhe në të njëjtën ditë kur foli edhe ambasadori amerikan në Tiranë Donald Lu, i cili ashiqare deklaroi se do të arrestohen si Al Capone-t shqiptarë, ashtu edhe Shullazët… /tesheshi.com/
