Ndërsa Komisioni Evropian ka përjashtuar çfarëdo rinegocimi me Britaninë e Madhe lidhur me daljen nga Blloku, kancelarja gjermane Angela Merkel është ajo që sheh “dritë në fund të tunelit”.
Gjatë takimit të sotëm në Berlin me kryeministrin britanik Boris Johnson, ajo tha se sheh “mundësi kompromisi” lidhur me Brexitin.
Ajo madje përdori një ton mjaft pragmatik duke thënë se “do të donte të dëgjonte propozimet” për të gjitha alternativat e daljes – e sidomos lidhur me shmangien e një kufiri ashpërisht të kontrolluar mes Britanisë së Madhe dhe Irlandës.
Ishte kryeministri britanik ai që të hënën i shkroi BE-së për të kërkuar heqjen e ndalesës për mosndryshimin e marrëveshjes, gjë që ishte miratuar nga paraardhësja e tij Theresa May.
Kjo është vizita e parë zyrtare e Johnsonit prej se erdhi në detyrë, ndërsa ajo e radhës pritet të jetë nesër në Paris, ku do të takohet me presidentin Emmanuel Macron. /tesheshi.com/
