Nënkryetari i PD-së, Edi Paloka, ka reaguar në lidhje me takimin e kryeministrave të Ballkanit Perëndimor që po mbahet në Durrës, duke kërkuar të bëhet transparente mënyra sesi do të realizohet një zonë ekonomike, ide kjo e artikuluar nga Komisioneri për Zgjerimin, Johannes Hahn.
“Pa marrë përsipër as rolin e historianit e as atë të specialistit në ekonomi, thjesht si qytetar i këtij vendi, do të doja që të bëhej transparencë për këtë “bashkim” të ri , informacioni për të cilin deri tani ka mbetur në kuadrin e thashethemeve”, shkruan Paloka në një postim në rrjetet sociale.
Në vijim ai kujton kohën kur Enver Hoxha kishte marrëdhënie të mira me Titon dhe së bashku flisnin për bashkimin ekonomik mes Shqipërisë dhe Jugosllavisë.
Komenti i nënkryetarit të PD-së
Në periudheë e mjaltit me Titon, Enver Hoxha pranoi propozimin për bashkimin ekonomik të Shqipërisë me Jugosllavinë.
Siç do të pranonte vetë diktatori pas “prishjes” me dashurinë e parë në kampin komunist ( jugosllavët formuan PK të Shqipërisë dhe vunë Hoxhen në krye te saj), bashkimi ekonomik me Jugosllavinë fshihte qëllimin politik të bashkimit të Shqipërisë me Jugosllavinë në kuadrin e federatës. Ndërkaq, zbatimi i planit, për aq kohë sa u zbatua, shënoi rrënimin e plotë dhe të asaj ekonomie që kishte Shqipëria në atë periudhë.
Pa marrë përsipër as rolin e historianit e as atë të specialistit në ekonomi, thjesht si qytetar i këtij vendi, do të doja që të bëhej transparencë për këtë “bashkim” të ri , informacioni për të cilin deri tani ka mbetur në kuadrin e thashethemeve.
Një gjë është e konfirmuar të paktën deri më sot (përfshi takimin e Triestes); i vetmi vend që nuk ka përfituar është Shqipëria e Ramës”, shkruan Edi Paloka në rrjetet sociale. /tesheshi.com/
