Takim joformal, që do të zhvillohet të shtunën (26 gusht) në kompleksin e Vilave Qeveritare në Durrës, do të mbledhë bashkë kryeministrat e Ballkanit Perëndimor, Komisionerin për Zgjerimin, Johannes Hahn dhe Cyril Muller, zv.presidenti i Bankës Botërore për Europën dhe Azinë Qendrore.
Takimin e kanë konfirmuar kryeministri i Kosovës Isa Mustafa, ajo e Serbisë Ana Brnabiç, i Maqedonisë, Zoran Zaev, i Malit të Zi, Dushko Markoviç si dhe kryetari i Këshillit të Ministrave të Bosnjes, Denis Zvizdiç.
Në njoftimin e zyrës së shtypit të qeverisë shqiptare thuhet se temat kryesore që do të diskutohen do të jenë tregtia, shërbimet, investimet dhe ekonomia digjitale.
“Pritet që Kryeministrat e Ballkanit Perëndimor të diskutojnë më tej dhe të garantojnë angazhim maksimal në nivel të lartë në drejtim të zbatimit të Planit Shumëvjeçar të Veprimit për Zonën Ekonomike Rajonale për të cilën u ra dakord në Samitin e Triestes. Gjithashtu, rezultatet e deritanishme të Procesit të Berlinit dhe perspektivat e ardhshme të bashkëpunimit rajonal të Ballkanit Perëndimor do të jenë një nga temat e diskutimit”, thuhet në njoftim. /tesheshi.com/
