Presidentët Putin dhe Erdogan diskutuan të dielën kërkesat e Moskës drejtuar Aleancës së Atlantikut të Veriut për zgjidhjen e krizës ukrainase.
Presidenca turke tha se presidentët “diskutuan masat për të përmirësuar marrëdhëniet dypalëshe”, raportoi AFP.
Kremlini tha se Putin dhe Erdogan në një bisedë telefonike “konfirmuan synimin e tyre për të forcuar një partneritet reciprokisht të dobishëm midis dy vendeve”.
Një deklaratë nga Kremlini shtoi se presidentët përmendën edhe çështjet ndërkombëtare, si kërkesat e Moskës ndaj Aleancës për të garantuar sigurinë e Rusisë, si dhe situatën në Libi dhe Siri.
Rusia dhe Turqia ruajnë partneritete pavarësisht interesave të ndryshme dhe konfliktuale në fusha të ndryshme, si Siria apo Libia, ku ata janë lojtarë kryesorë.
Megjithatë, ka tensione mes Moskës dhe Ankarasë për krizën ukrainase.
Putini e qortoi së fundmi Erdoganin për furnizimin e ushtrisë ukrainase me dronë të armatosur të përdorur kundër rebelëve pro-rusë në Ukrainën lindore.
Vendet perëndimore janë shqetësuar prej javësh për ndërhyrjen e mundshme ruse në Ukrainë.
Ata akuzuan Moskën për grumbullimin e trupave në kufirin me Ukrainën, ndërsa Ankaraja vlerësoi së fundmi kërkesat “të njëanshme” të Kremlinit drejtuar NATO-s, anëtare e së cilës është.
Duke mohuar planin për të pushtuar Ukrainën, më 17 dhjetor, Rusia paraqiti propozime për një marrëveshje për të kufizuar ndikimin amerikan dhe të NATO-s në fqinjësinë e saj.
Propozimet do të shqyrtohen më 12 janar, në një takim të Këshillit NATO-Rusi.
Kujtojmë se pas nmjë krize mes dy vendeve, liderët respektive kanë krijuar një partneritet tipik të një shahu diplomatik, luajtur në rrethana tejet delikate globale. /tesheshi.com/
