Takimi i parë i Komisionit të Përbashkët të Serbisë dhe Kosovës për Personat e Zhdukur do të mbahet të mërkurën, më 15 janar në Bruksel, konfirmoi Komisioni Evropian për Tanjug.
“Të mërkurën, më 15 janar 2025, në Bruksel do të mbahet mbledhja inauguruese e Komisionit të Përbashkët për Personat e Zhdukur, i krijuar si pjesë e Deklaratës Politike të 2023 për Personat e Zhdukur. BE do të kryesojë takimin me delegacionet e Kosovës dhe Serbisë”, thuhet në një përgjigje me shkrim për Tanjug.
Komisioni nuk ka dhënë detaje tjera rreth mbajtjes së këtij takimi.
I dërguari i posaçëm i BE-së për dialogun Serbi-Kosovë, Miroslav Lajčák, njoftoi të hënën se fokusi në Bruksel këtë javë do të jetë në çështjen e personave të zhdukur dhe se takimi i parë i Komisionit të Përbashkët për Personat e Zhdukur është i afërt.
Komisioni është pjesë e Deklaratës për Personat e Zhdukur, të miratuar nga presidenti serb Aleksandar Vuçiç dhe kryeministri i Kosovës Albin Kurti më 2 maj 2023.
Vlerësohet se fati i më shumë se 1600 personave mbetet i panjohur, 25 vjet pas përfundimit të konfliktit mes UÇK-së dhe ushtrisë serbe. /tesheshi.com/
