Mijëra protestues mbushën dje rrugët e Munihut, duke ngritur zërin kundër takimit të G7-s që do të mbahet më 7-8 qershor.
Kryefjala e organizatave joqeveritare, e ambientalistëve dhe e një sërë politikanëve qe, “Ndal TTIP-së, shpëtoni klimën, luftoni varfërinë.”
Partneriteti Transatlantik i Tregtisë dhe Investimit, apo TTIP, është një marrëveshje tregtare që po diskutohet mes negociatorëve europianë dhe amerikanë. Sipas sondazheve të fundit, një pjesë e mirë e gjermanëve, diku te 43%, mendojnë se kjo marrëveshje do të jetë e keqe për vendin e tyre.
Duke iu referuar policisë së Munihut, mbi 34.000 njerëz kanë marrë pjesë në manifestimin paqësor, ndërsa 3.000 forca policore kanë qenë në veprim dhe kanë shoqëruar protestuesit.
Takimi i fundjavës i G7-s pritet të përqendrohet mes të tjerash te tregtia ndërkombëtare, te krizat e sigurisë globale dhe te zvogëlimi i varfërisë.
Mijëra punonjës policie do të jenë në mbikëqyrje të aktivitetit të kryesuar nga kancelarja gjermane, Merkel, me praninë e udhëheqësve të SHBA-ve, Japonisë, Britanisë, Francës, Kanadasë e Italisë, për të shmangur çdo incident gjatë manifestimeve të tjera të paralajmëruara. /tesheshi.com/
