Selman bin Abdulaziz, mbreti i Arabisë Saudite, do të marrë pjesë në takimin e G20-ës që mbahet në datat 15-16 nëntor në Antalja, e për këtë ka rezervuar një hotel të tërë.
Mardan Palace, një prej më luksozëve e më të shtrenjtëve në Europë e në Mesdhe, është hoteli ku do të qëndrojë mbreti saudit së bashku me shpurën e tij.
1000 njerëz do ta shoqërojnë atë në këtë vizitë, e raportohet se shuma që ai do të paguajë për hotelin do të jenë mjaft e madhe.
Hoteli dhe kompleksi i vilave prej 560 dhomash do të jetë i mbyllur për vizitorët e tjerë gjatë qëndrimit 18-ditor të Selman bin Abdulazizit, dhe shuma e paguar për këtë qëndrim raportohet se do të jetë 18 milionë dollarë.
I gjithë hoteli do të jetë i rezervuar, dhe askush nuk do të mund të qëndrojë në të gjatë ditëve që ai do t’i hapë dyert për mbretin e Arabisë Saudite.
Personeli po bën një përgatitje të veçantë për t’i shërbyer mbretit, e po ashtu po i kushtohet kujdes gjithçkaje.
Mardan Palace u inaugurua më 23 maj të 2009-ës, me një ceremoni ku morën pjesë yjet e muzikës dhe kinematografisë botërore. Rëra në plazhin para hotelit është e veçantë. Nëntë mijë tonë rërë në ngjyrë ari janë sjellë nga Egjipti. E veçanta e kësaj rëre se nuk t’i djeg këmbët, e po ashtu nuk i ngjit këmbët e lagura.
Mbreti Selman do të vihej dhe gjatë verës në qendër të vëmendjes, pasi pushimet e tij në Francë, në Cote d’Azur, u shoqëruan me mbylljen e plazhit publik dhe me vendosjen e një ashensori të përkohshëm, çka solli reagimin kundërshtues të banorëve të zonës e më gjerë. /tesheshi.com/
