Në një konferencë shtypi në ambientet ku po zhvillohet takimi i G20-tës në Kinë, presidenti i Turqisë ka ripërsëritur thirrjen për krijimin e një “zone të sigurt” në Siri.
Ai ka kujtuar se e njëjta kërkesë e tij nuk ka marrë më parë përgjigje, duke i kritikuar vendet perëndimore për mosmarrjen e asnjë veprimi kur është sugjeruar një “zonë e sigurt” që mund ta zgjidhte krizën siriane.
“Në takimin e udhëheqësve në Antalja, ne thamë se kriza siriane mund të zgjidhet duke krijuar një zonë të sigurt për refugjatët, dhe ne e përsërisim këtë. Asnjë vend i vetëm nuk ndërmori një hap të fortë,” është shprehur Erdogani në konferencën e shtypit.
Në bisedimet me udhëheqësit amerikanë e rusë është kërkuar një “zonë jofluturimi”, ka theksuar Erdogani.
Ai u ka bërë thirrje udhëheqësve botërorë për një qëndrim të bashkuar kundër të gjitha grupeve terroriste, pa i ndarë në të mirë dhe të këqij.
“Terrorizmi e ka shtuar kërcënimin kundër botës dhe vazhdon ta shtojë për çdo ditë. Përpjekja e përgjakshme për grusht shteti [në Turqi] është gjithashtu një formë tjetër terrorizmi. Nëse nuk do të ketë një qëndrim të përbashkët globalisht, terrori herët a vonë do t’i godasë ata që qëndrojnë të heshtur ndaj terrorizmit.”
Erdogani ka kritikuar qëndrimin e Perëndimit në lidhje me krizën e refugjatëve.
“Qëndrimi proteksionist, e madje racist, i adoptuar nga Perëndimi në lidhje me çështjen e refugjatëve është një turp për njerëzimin.”
Shtetari më i lartë turk ka vënë në pah se vendi i tij do të vijojë me politikën e dyerve të hapura e do t’i presë refugjatët edhe nëse nuk merr ndihmë financiare.
Në fund, presidenti Erdogan ka bërë të ditur se po bisedohej me forcat e koalicionit të udhëhequr nga SHBA-të e me Rusinë për një armëpushim në Halep, që shpresohet të nisë para Kurban Bajramit. /tesheshi.com/
