Nga Blendi Gashi
Ndërsa roli i presidentit është unifikues dhe të gjejë zgjidhje për krizat politike, pra të ndërmjetësojë mes partive që ato të gjejnë një gjuhë të përbashkët, Thaçi me veprimet e fundit po tregon të kundërtën.
Ai hiç më larg se dje në mënyrë tinzare dhe larg syrit të mediave, në një nga restorantet e vendit tregoi qartë se mban anë, pasi zhvilloi një takim me kandidatin për kryeministër nga koalicioni PAN, Ramush Haradinaj.
Preisdenti, edhe pse u kap nga mediat nuk e tha asnjë fjalë për takimin me Haradinajn, pra nuk tregoi se pse duhet ta takojë jashtë institucioneve dhe zyrës së tij një kandidat për kryeministër, dhe pse vetëm atë e jo dhe kandidatët tjerë.
Ky vepim i presidentit Thaçi po shihet si i njëanshëm. Si përfaqësues partish e si analistë, thonë se kjo sjellje e kreut të shtetit po e tensionon situatën.
Albulena Haxhiu nga Vetëvendosje, e cika ka rifituar mandatin e deputetes thotë se Thaçi me takime të fshehta dhe jotransparente është i vendosur për aktivitete përçarëse.
“Me veprime të tilla, i njëjti nuk po e ushtron mandatin e tij në përputhje me Kushtetuten dhe pergjegjësitë që ka. Edhe një herë, nuk është në mandatin e tij t’i shërbejë edhe më tutje koalicionit të ‘Prontos’ por t’ia kalojë mandatin partisë fituese që mund t’i bëjë numrat”, thotë Haxhiu.
Haxhi Avdyli, deputet i ri i LDK-së thotë se presidenti duhet të mbajë takime me përfaqësues të të gjitha partive e jo vetëm një partie/koalicioni dhe se takimet duhet të jenë transparente dhe brenda institucioneve e jo lokaleve.
“Është detyrë kushtetuese e kreut të shtetit të takohet me drejtues të partive, por takimet duhet të jenë zyrtare e jo të bëhen nëpër kafeve sepse shtohen dyshimet. Presidenti nuk duhet të tregoj anshmëri për asnjë subjet edhe pse dihet se Hashim Thaçi është produkt i PDK-së, por Kushtetuta është mbi partinë dhe ai duhet ta respektojë atë, përndryshe nëse bën shkelje është Gjykata Kushtetuese e cila është mbi presidentin. Takimi i djeshëm nuk i përngjajke një takimi serioz institucional, dhe takimet e tilla nuk janë produktive dhe nuk sjellin zgjidhje por vetëm bllokada”, thotë Avdyli për tesheshi.com.
Politologu Mentor Tahiri, pohon se takimi i fshehtë i presidentit me Haradinajn dëshmon qartë mungesën e kulturën institucionaliste dhe të përgjegjësisë politike në vend, e cila sipas tij po mbretëron te një numër jo i vogël i lojtarëve kyç të cilët po drejtojnë politikën.
“Presidenti asnjëherë si tani, ka shansin ideal që të dëshmojë se ai është një burrështetas. Fatkeqësisht, natyra klandestine e këtij takimi si dhe ambienti jozyrtar i takimit, shpijnë në një drejtim krejtësisht tjetër. Aq më tepër presidenti, respektivisht Presidenca si institucion, gjatë gjithë kohës po mbajnë një tension të situatës, duke bërë vetëm prononcime të pjesshme, apo edhe krejtësisht të paqarta” thotë Tahiri për tesheshi.com.
Sipas tij në një shtet funksional, presidenti do të duhej që me një zyrtaritet dhe transparencë të plotë të mbajë takime me krerët e subjekteve politike, në mënyrë që vetë ta ketë të qartë çështjen e mandatimit për formimin e qeverisë, e sidomos në rastin kur i mandatuari i parë dështon.
“Në vend të kësaj, po lihet një shijë e njëanshmërisë politike, e cila mund të ketë pasoja serioze për legjitimitetin e institucioneve të Republikës”, thotë Tahiri.
Kujtojmë se Haradinaj pas takimit me Thaçin ka shprehur bindjen se javën tjetër do mbahet seanca konstituive e Kuvendit por ka thënë se nuk janë dakorduar për datën se ku do mbahet.
