Qeveria mblodhi për herë të dytë shtabin e Emergjencave brenda kësaj dite të vështirë dhe të gjatë përmbytjesh që sollën shirat e dendur.
Kreu i Shtabit të Emergjencave, Shemsi Prençi, tha se bilanci është me dy viktima dhe me evakuimin e 180 familjeve në nivel kombëtar.
Sipas tij, në terren vazhdojnë të jenë 300 forca të policisë dhe 200 forca zjarrfikëse të rajonit Lezhë, Shkodër, Tiranë dhe Mat, 50 forca të ushtrisë me mjete lundruese dhe të rënda, 70 forca të emergjencave civile që po bëjnë kordinimin.
Kryeministri Edi Rama e vuri theksin në fushatën e gjerë të 2 viteve të fundit në pastrimin e kanaleve kulluese, që sipas tij, nëse nuk do të ishte ndërmarrë, mund të kishte bërë që situata të ishte më dramatike.
60 mijë familje në të gjithë Shqipërinë vuajnë kufizimin e energjisë elektrike, por sipas Ministrit Damian Gjiknuri, situata po përmirësohet dhe hidrovoreve nuk i ka munguar energjia. Ministrat raportuan për mungesë të energjisë elektrike, përmbytje të institucioneve arsimore, spitaleve, qendrave shëndetësore dhe kufizime me ujë të pijshëm. /tesheshi.com/
