Pas vizitës që zhvilloi të martën në Serbi, zv. ndihmës sekretari amerikan i Shtetit, përgjegjës për çështjet evropiane dhe euroazi, Hoyt Brian Yee, ka takuar sot krerët e Kosovës, presidentin Thaçi, kryeministrin Haradinaj dhe kryekuvendarin Veseli.
Në takimin sy më sy me Thaçin, zyrtari i lartë amerikan ka thënë se SHBA-ja do të vazhdojë mbështetjen e gjithmbarshme për Kosovën.
“Perspektiva evropiane për Kosovën, si dhe për tërë rajonin, janë prioritete të SHBA-së”, u shpreh Yee.
Ndërsa në takimin me Veselin, zyrtari Yee theksoi nevojën e përshpejtimit të agjendës evropiane për vendin dhe vlerësoi përkushtimin e Kosovës në përmbushjen e detyrave që ka.
Yee është takuar edhe me kryeministrin Haradinaj por nuk ka një njoftim se çfarë ka biseduar me të.
Mediet u lejuan të marrin vetëm pamje gjatë takimit, të dy nuk u deklaruar se për çka diskutuan.
Zyrtari amerikan do të zhvillojë takime edhe me përfaqësues të minoriteteve dhe përfaqësues tjerë politikë në Kosovë.
Kjo është vizita e parë e një zyrtari të lartë të Shteteve të Bashkuara që nga zgjedhja e institucioneve të reja qendrore të Kosovës, përkatësisht qeverisë dhe konstituimit të Kuvendit. /tesheshi.com/
