Vetingu në institucionet e sigurisë dhe sistemit të drejtësisë për pastrimin e tyre nga zyrtarët me probleme në integritetin profesional dhe personal ka qenë objekti i takimit mes kryeprokurores së përkohshme, Arta Marku dhe ministrit të Brendshëm Fatmir Xhafaj.
Takimi zgjati gati 20 minuta dhe u mbajt në Prokurorinë e Përgjithshme.
“Në qendër të diskutimit ishte procesi i Vetingut në sistemin e drejtësisë, si edhe i njëjti proces i pritshëm edhe në radhët e Policisë së Shtetit. Dy titullarët shprehën dakordësinë e plotë se këto procese kërkojnë një komunikim të vazhdueshëm dhe intensiv, me qëllim realizimin sa më të plotë dhe të shpejtë të pastrimit të institucioneve të sigurisë dhe të sistemit të drejtësisë nga zyrtarët me probleme në integritetin profesional dhe personal”, thuhet në njoftimin e prokurorisë.
Një ditë më parë Marku priti në zyrë edhe kreun e komanduar të SHISH, Helido Bendo si dhe ambasadoren gjermane në Shqipëri, Susanne Schütz. /tesheshi.com/
