Sigmar Gabriel mund të krijojë një tjetër pështjellim këtë javë. Kryeministri izraelit ka kërcënuar se mund t’i anulojë bisedimet me të nëse shefi i politikës së jashtme gjermane do të takohet me dy OJQ kritike ndaj qeverisë së Izraelit.
Një zyrtar izraelit, emri i të cilit nuk bëhet i ditur, ka pohuar se Netanyahu mund të mos e takojë këtë të martë Sigmar Gabriel-in nëse ky zhvillon takime me dy grupime të të drejtave, njëri prej të cilëve është B’Tselem.
Siç thotë AFP-ja, anulimi i takimit mes Netanyahu-t dhe Gabriel-it do të ishte një veprim i rrallë, por në përputhje me qëndrimin e qeverisë izraelite, që i akuzon këto grupe për axhenda politike.
Sigmar Gabriel e ka konfirmuar po ashtu faktin e mësipërm teksa ka folur për transmetuesin gjerman ZDF.
“Po mësojmë përmes medias izraelite se kryeministri Netanyahu, të cilin e kam takuar shpesh, kërkon ta anulojë këtë takim sepse duam të takojmë përfaqësuesit kritikë të shoqërisë civile.”
Kryediplomati gjerman ka nënvizuar se do të ishte për të ardhur keq nëse ndodhte një anulim i tillë i takimit. /tesheshi.com/
