Ambasadori amerikan në Tiranë, Donald Lu, si në takimin me grupin parlamentar të Partisë Socialiste, ashtu edhe me atë të Lëvizjes Socialiste për Integrim, ka ngritur çështjen e deputetëve që mund të jenë kundërshtarë të reformës në drejtësi, si pasojë e problemeve që kanë pasur me ligjin.
Gjithçka është bërë e mbyllur, por siç mësohet ambasadori i SHBA në Tiranë, Donald Lu dhe ajo e BE-së Romana Vllahutin, kanë folur për një “Aleancë mikse” që synon të ruajë statukuonë në sistemin aktual të drejtësisë.
Siç mësohet fjala ka qenë thuajse standard në të dy grupet, por në të dyja mbledhjet si në PS ashtu dhe në LSI, ka pasur një qëndrim se nuk do të ketë votë kundër reformës për drejtësi. Qëndrimin për PS-në e ka dhënë Kryeministri Edi Rama, kurse për LSI-në, kreu i grupit parlamentar Petrit Vasili.
“Prania ime këtu është shprehja e rëndësisë së kësaj reforme për Shtetet e Bashkuara të Amerikës. Jemi në një udhëkryq të pazakontë për reformën në drejtësi”, u shpreh Lu pas daljes nga selia rozë.
Ndërsa Vlahutin tha se nuk është “fort e pazakontë që partnerët të flasin me njëri-tjetrin.
“Jemi këtu që Shqipëria të arrijë standardet për anëtarësimin në BE dhe jemi të angazhuar në një dialog si miq dhe partnerë. E drejta sovrane u takon deputetëve, që ua kanë dhënë zgjedhësve, që ne e respektojmë dhe nuk do të ndërhyjmë, por është me rëndësi që të përfshihemi në dialog si aleatë. Kemi vendosur afate të caktuara kohore dhe dëshironim që t’i ritheksonim këto çështje që të zbatohet reforma në drejtësi”, u shpreh Vlahutin.
Kryeministri Edi Rama, tha pas takimit se “ambasadorët i bien pragut të dëgjojë dera, por dera nuk është këtu. Dera nuk është Partia Socialiste sepse ne këtu jemi të hapur për të realizuar reformën në drejtësi. Të ishte për ne, do të ishte e votuar. Erdhën këtu jo sepse duan qeverisjen e vendit, as për drejtimin e PS-së, por sepse përfaqësojnë SHBA-në dhe BE-në, që në nivelet më të larta janë të interesuar për këtë reformë sepse është reformë historike që është në interesin jo vetëm të Shqipërisë, por edhe të BE-së”.
Në lidhje me kushtëzimet e opozitës, Rama tha: “Reforma nuk mund të kushtëzohet me asgjë. Sa i përket reformës zgjedhore, jemi të hapur për diskutime, negociata dhe për gjetje rrugësh që çojnë në zgjedhje sa më të mira dhe dinjitoze. Por ç’lidhje ka kjo me reformën në drejtësi? Është reforma në drejtësi ajo që ndihmon zgjedhjet. Kushtëzimet janë shprehje dobësie ose mungese vullneti në rastin më të keq. Reforma është me rëndësi historike dhe ka mbështetjen e të gjithëve, socialistë e demokratë bashkë. Është reformë që për 10 vjet të kemi një sistem dinjitoz drejtësie dhe të mund të hapim negociatat që këtë vit”.
Edhe Petrit Vasili ishte i prerë për ta votuar.
“Jemi të qartë se duhet mbyllur, nuk ka asnjë moment të pakapërcyeshëm dhe asistenca e ndërkombëtarëve është ndihmë e jashtëzakonshme për kalimin e ngërçeve”, tha kryetari i grupit parlamentar të LSI-së. PS dhe LSI bëjnë së bashku 84 vota, ndërsa për të bërë ndryshimet kushtetuese duhen edhe 10 të tilla pra 94./tesheshi.com/
