Skena politike shqiptare është bërë gati për një tronditje të fuqishme që pritet të shpallet shumë shpejt, para nisjes së kryeministrit Edi Rama në Uashington.
Një deputet që nuk dëshiroi të bëhej publik, i tha tesheshi.com se bëhet fjalë për një ndryshim të sigurt të kabinetit qeveritar.
Në mënyrë të papritur, gjatë ditës së sotme ambasadori i Shteteve të Bashkuara të Amerikës, Donald Lu, është takuar me kryeministrin Edi Rama, në prezencën e ministrit të Brendshëm, Saimir Tahiri; më pas ka lëvizur për në Presidencë ku për një orë ka takuar kreun e shtetit Bujar Nishani, ndërsa njoftohet se i treti në radhë ka qenë kreu i Kuvendit, Ilir Meta.
Për të gjithë këtë seri takimesh të pazakonta nuk ka asnjë njoftim për shtyp, edhe pse u kërkua tek zyrat përkatëse të shtypit.
Siç mësohet, dekriminalizimi dhe zbatimi i tij është baza e të gjithë bisedimeve, të cilat cilësohen si “turbulente”.
Parlamenti shqiptar pritet të vazhdojë largimin e anëtarëve të inkriminuar, numri i të cilëve flitet se shkon deri në 19 nga të dyja krahët.
Ndërkaq, Edi Rama, në selinë rozë ka mbledhur një shtab drejtuesish të Partisë Socialiste në qarqe për të organizuar nga e para PS-në.
Edhe pse nga zyrat e partisë në pushtet flitet se bëhet fjalë për përgatitjen për zgjedhjet parlamentare të 2017-s, një burim konfidencial theksoi se bëhet fjalë për diçka më të afërt që “mazhoranca duhet përgatitur për gjithçka”, ku natyrisht nënkuptohen zgjedhjet e parakohshme, që mund të sillnin një konfigurim të ri të skenës politike…/tesheshi.com/
