Komisioni Evropian, Parlamenti Evropian dhe Këshilli i BE-së filluan sot negociatat, d.m.th. një trilog, për të rënë dakord mbi qëndrimet për Instrumentin për Reforma dhe Rritje për Ballkanin Perëndimor, i cili i ofron rajonit gjashtë miliardë euro për periudhën 2024-2027.
Komisioneri i BE-së për Zgjerimin dhe Politikën e Fqinjësisë, Oliver Varhelyi, njoftoi në rrjetin social X se qëllimi është afrimi i partnerëve nga Ballkani Perëndimor me BE-në në mënyrë të përshpejtuar duke u ofruar atyre përfitimet e anëtarësimit para se të anëtarësohen.
Ai shtoi se BE-ja dëshiron të ndihmojë Ballkanin Perëndimor të kapërcejë hendekun ekonomik në kohën e duhur.
Presidenti i Komisionit për Punë të Jashtme të Parlamentit Evropian, David McAllister, tha të martën se pret që negociatat ndërinstitucionale të fillojnë këtë javë dhe shtoi se PE dëshiron të vazhdojë të mbështesë partnerët nga Ballkani Perëndimor, por se ekzistojnë disa kushte që duhet plotësuar.
Një gur themeli për Ballkanin Perëndimor
Instrumenti për Reforma dhe Rritje për Ballkanin Perëndimor, i cili paraqitet si themeli i Planit të ri të Rritjes për Ballkanin Perëndimor, planifikon të ndajë dy miliardë euro grante dhe katër miliardë euro kredi në periudhën 2024-2027 me qëllim për të mbështetur Ballkanin Perëndimor në rrugën drejt anëtarësimit në Bashkimin Evropian.
Pagesa e këtyre fondeve varet nga zbatimi me sukses i disa reformave të përcaktuara në axhendën e reformave të çdo vendi përfitues.
Negociatat për anëtarësim në BE po udhëhiqen nga Mali i Zi dhe Serbia, Komisioni Evropian ka njoftuar se do të rekomandojë hapjen e negociatave me Bosnjën, ndërsa Maqedonia e Veriut dhe Shqipëria janë në pritje të hapjes së negociatave. /tesheshi.com/
